სპეციფიური ლიცენზიის მქონე ბანკების განვითარება ხელს შეუწყობს ახალი ინვესტორების მოზიდვას და კონკურენციის გაღრმავებას, — ამის შესახებ „კომერსანტთან“ საბანკო ასოციაციის ხელმძღვანელმა ალექსანდრე ძნელაძემ ციფრული ბანკის და მიკრობანკების ლიცენზიის მნიშვნელობაზე საუბრისას განაცხადა.
მისი თქმით, ქვეყნისთვის უმნიშვნელოვანესია ისეთი ინოვაციური სერვისების შემოღება, როგორიც ციფრული ბანკია, ასევე მნიშვნელოვანია მიკრობანკების პროექტიც.
„დღეს უკვე გვაქვს ერთი ციფრული ბანკის ლიცენზია, უახლოეს მომავალში ველოდებით მიკრობანკების ლიცენზიას. ეს არის სიახლე, რადგან სპეციფიური ლიცენზიები საქართველოში არ არსებობდა. ეს არის პირველი შემთხვევა როდესაც არაუნივერსალური ლიცენზიებია გაცემული.
ციფრული ბანკის გამოჩენა მნიშვნელოვანია საქართველოსთვის იმ თვალსაზრისით, რომ ახალი ინოვაციური პროდუქტების შეთავაზება მოხდეს მომხმარებლისთვის. სპეციფიური ლიცენზიის მქონე ყველა ბანკის განვითარება ხელს შეუწყობს ახალი ინვესტორების მოზიდვას და საბანკო სისტემაში კონკურენციის გაღრმავებას. დღეს უკვე არსებობს 15 მოქმედი ბანკი და იმედია რომ მსგავსი სიახლეები ინვესტორებს კიდევ უფრო მეტად წაახალისებს“, — ამბობს ალექსანდრე ძნელაძე.
საქართველოში პირველმა ციფრულმა ბანკმა „პეისერა საქართველომ“ საბანკო ლიცენზია გასული წლის ნოემბერში მიიღო. ბანკს საბანკო საქმიანობის ლიცენზიის მიღებიდან 4 თვის მანძილზე სატესტო რეჟიმში უნდა ემუშავა და რეალურ გარემოში საბანკო საქმიანობის განხორციელება შეზღუდული ჰქონდა, თუმცა ახალი განკარგულებით ეს ვადა 7 თვემდე გაგრძელდა. რაც შეეხება მიკრობანკებს, ისინი საქართველოში 2024 წლიდან გამოჩნდებიან. საკანონმდებლო ჩარჩო მიკრობანკების შესახებ უკვე მიღებულია და ეროვნულ ბანკს ახლა 1 ივლისამდე აქვს ვადა ამ კანონით გათვალისწინებული სამართლებრივი აქტები გამოსცეს. კანონით, ეროვნულმა ბანკმა დაინტერესებულ პირისთვის მიკრობანკის ლიცენზია განაცხადის წარგენიდან 6 თვის ვადაში უნდა უზრუნველყოს.