საერთო სამუშაო სივრცეებზე მოთხოვნა მნიშვნელოვნად გაზრდილია. თიბისი კაპიტალის კვლევის მიხედვით, მნიშვნელოვნად აღდგა მოთხოვნა საოფისე ფართებზე და 2021 წელთან შედარებით 2022-ში გაორმაგდა მოთხოვნა საერთო სამუშაო სივრცეებზე.
Impact Hub Tbilisi-ს თანადამფუძნებელი ქეთი ებანოიძე „კომერსანტთან“ ამბობს, რომ საერთო სამუშაო სივრცე სრულად დატვირთულია, მოთხოვნა კი თანაბრადაა, როგორც ქართველი, ასევე უცხოელი მომხმარებლების მხრიდან.
„პანდემიამ ძალიან შეცვალა სამუშაო კულტურა არამარტო საქართველოში, არამედ მთელ მსოფლიოში. კოვიდი იყო ერთგვარი ტრამპლინი საერთო სამუშაო სივრცეების მიმართულებით, რადგან იმ პერიოდში აღნიშნულ სივრცეებს იყენებდნენ არამახლოდ ფრილანსერები, არამედ მსხვილი კომპანიებიც. შესაბამისად, პანდემიის შემდეგ ძალიან გაიზარდა მოთხოვნა საერთო სამუშაო სივრცეებზე და 2022 წელი Impact Hub Tbilisi-მა სრული დატვირთვის დაასრულა, ახლაც ასე გრძელდება.
ძალიან ბევრი რუსეთის, უკრაინის და ბელარუსის მოქალაქე ჩამოდის საქართველოში, რომლებიც დასაქმებულები არიან საერთაშორისო კომპანიებში და მათ სამუშაოდ საერთო სამუშაო სივრცეები შეარჩიეს, რამაც ასევე გაზარდა მოთხოვნა. დღევანდელი მდგომარეობით Impact Hub Tbilisi-ში ქართველი და უცხოელი მომხმარებლების რაოდენობა 50-50%-ზეა“, — აღნიშნავს ქეთი ებანოიძე.
როგორც ქეთი ებანოიძე ამბობს, ფასების ზრდის კუთხით ბოლო პერიოდში ცვლილება არ ყოფილა, ის მცირედით ერთი წლის წინ გაიზარდა და ამ ეტაპზე არსებული მაჩვენებელი ნარჩუნდება. მისი თქმით, გასული წლის ბოლოს EUROASIAN STARTUP AWARDS-ის რეგიონული გამარჯვებული Impact Hub Tbilisi გახდა და GLOBAL STARTUP AWARDS-ის ფინალშია გადასული.