სტარტაპების წარუმატებლობის ერთ-ერთი მიზეზი მოზიდული ინვესტიციის არასწორი გადანაწილებაა — ამის შესახებ Impact Hub Tbilisi-ს დამფუძნებელმა ქეთი ებანოიძემ ლევან ბოძაშვილის საავტორო გადაცემაში „ნეირონი“ განაცხადა.
მისი თქმით, საქართველოში ბოლო პერიოდში მნიშვნელოვნად განვითარდა სტარტაპ ეკოსისტემა, თუმცა პრობლემები მაინც არსებობს.
„Impact Hub მხოლოდ სივრცის გაქირავებაზე არ არის ორიენტირებული, არამედ სხვადასხვა საინტერესო იდეების თავმოყრის ადგილია. სწორედ ამიტომ როდესაც გავხსენით Impact Hub დავიწყეთ სხვადასხვა პროგრამის და პროექტის განხორციელება, რომელიც ემსახურება მეწარმეობის, სტარტაპ ეკოსისტემის გაძლიერებას.
საქართველო პატარა ქვეყანაა, თუმცა ბოლო პერიოდში ძალიან გავნითარდა სტარტაპების ეკოსისტემა და არის ქართველ ახალგაზრდებში ის პოტენციალი, რომ შექმნან ისეთი სტარტაპი, რომელიც უნიქორნი იქნება. თუმცა აქ რამდენიმე პრობლემაა, ინვესტორებს უნდათ რომ სტარტაპის საკონტროლო პაკეტი აიღო, რაც ძალიან დიდი შეცდომაა, რადგან სტარტაპი დგას გუნდზე და მათი მოტივაციაზე, ინვესტორმა თუ ეს მოტივაცია გამოაცალა, ჩათვალე რომ ის მოკვდება. გარდა ამისა, მეორე პრობლემაა რომ ინვესტორების რაუნდები ერთჯერადი არ არის, ამიტომ შენ როგორც ინვესტორს უნდა გქონდეს შესაძლებლობა რომ გახსნა შემდეგი რაუნდები. ამიტომ ვთვლი, რომ ქართველ ინვესტორებთან გასავლელია ეს საკითხები, თუმცა ამ მხრივაც წინსვლაა.
რამდენიმე ხნის წინ კვლევა ჩატარდა თუ რატომ „ფეილდებიან“ სტარტაპები და ერთ-ერთი ოცეულში მოწინავე ადგილზე იყო ე.წ. „ქეშის გახარჯვა“ ანუ სტარტაპების წარუმატებლობის ერთ-ერთი მიზეზი მოზიდული ინვესტიციის არასწორი გადანაწილებაა. რა თქმა უნდა მნიშვნელოვანია, რომ სტარტაპი ფინანსურ ნაწილს ფარავდეს და ხარჯვის ცოდნა არსებობდეს. ჩვენ ფაქტობრივად ვფარავთ ყველა იმ ნაწილს რაც სტარტაპს შესაძლოა დასჭირდეს, დაწყებული მარკეტინგით და ბიზნეს მოდელით, ფიჩინგით და ფაქტობრივად ყველა ის ნაწილი რაც სტარტაპში უნდა დაიფაროს ვანაზღაურებთ, თუმცა რა თქმა უნდა ბიზნეს მოდელი ხშირად „აქილევსისი ქუსლია“ და გვიწევს ამ კუთხით აქტიური მუშაობა“, — აღნიშნავს ქეთი ებანოიძე.
მისი თქმით, მნიშვნელოვანია, ბავშვებს პატარაობიდანვე ვასწავლოთ რომ საკუთარი იდეის განხორციელება და ამ იდეის ირგვლივ სხვების გაერთიანება ძალიან მნიშვნელოვანია.
„ბავშვებს სკოლიდანვე უნდა ვასწავლოთ, რომ არამარტო დიდ კორპორაციებში მუშაობაზე უნდა იფიქრონ, არამედ მთავარია ეცადონ განახორციელონ თავიანთი იდეები, შემოიკრიბონ ამ იდეის გარშემო სხვები და შექმნან ისეთი კომპანია როგორშიც მათ სურთ მუშაობა.
რაც შეეხება გენდერულ გადანაწილებას, ამ მხრივ ძალიან დიდი სხვაობა გვაქვს, კაცები ტექნოლოგიებში უმრავლესობაში არიან, თუმცა ამაზეც აქტიურად მიდის მუშაობა, რომ ქალების ჩართვა უფრო მეტად მოხდეს“, — აღნიშნავს ქეთი ებანოიძე.