eAuction.ge-ს საძიებო სისტემაში საბრენდე სპირტის გაყიდვის მიზნით ჩატარებული აუქციონების რაოდენობა რამდენიმე ათეულ გვერდს აჭარბებს. აუქციონების 80 პროცენტი კი წარმოდგენილია სტატუსით: „არ შედგა“. მთავრობა მის საკუთრებაში არსებულ ტონობით საბრენდე სპირტს ვერ ჰყიდის.

მთავრობის საკუთრებაში არსებულ შპს აკურასა და მოსავლის მართვის კომპანიას აქვთ ვალდებულება, რომ შეიძინონ ყურძენი, რომლითაც საბრენდე/საკონიაკე სპირტი უნდა დაამზადონ. ამ პროცესს მთავრობა ყურძნის სუბსიდიის პროგრამის ფარგლებში აფინანსებს. მიღებული პროდუქტს კი ეს კომპანიები აუქციონების გზით ჰყიდიან ღვინისა და ბრენდის კერძო მწარმოებლების დასაინტერესებლად.

თუმცა, როგორც აღვნიშნეთ, აუქციონების უმეტესობა უშედეგოდ სრულდება და პროცესისთვის დახარჯული თანხები კი ბიუჯეტში ასახვას ვერ ჰპოვებს. სახელმწიფოს საკუთრებაში არსებული საბრენდე სპირტის რაოდენობა კი იზრდება.  „კომერსანტი“ სოფლის მეურნეობის სამინისტროს დაუკავშირდა, სადაც განმარტავენ, რომ აუქციონები არ შეწყდება, სანამ საბრენდე მასალის მთელი მარაგი არ ამოიწურება.

„ძირითადად, აუქციონზე რაც გატანილი იყო, იმის 20% გაიყიდა. ჩვენი პოლიტიკა და ტაქტიკაა, რომ სანამ ბოლომდე არ გაიყიდება ეს საბრენდე სპირტი, აუქციონი ყოველთვის იქნება. ყველაზე ბევრი იყიდება წლის ბოლოს და რთველის დასაწყისში. მოლოდინი გვაქვს, რომ ამ პერიოდებში აქტიურობასაც დავინახავთ“, - გვითხრეს სოფლის მეურნეობის სამინისტროში.

საიდან დაგროვდა დიდი მოცულობის სპირტი და რა თანხებზეა საუბარი? – ამ კითხვაზე პასუხია რთველის სუბსიდირების პროგრამა, რის მეშვეობითაც 2020 წელს 104 მილიონი ლარის ყურძენი ჩაიბარა სახელმწიფომ. მთლიანობაში 2020 წლის რთველის პროცესში სახელმწიფომ ინდუსტრიულად ჩაბარებული ყურძნის ⅓ შეისყიდა.

2020 წლის ბიუჯეტის შესრულების ანგარიშიდან ირკვევა, რომ არსებული მდგომარეობით, სახელმწიფოს დაქვემდებარებაში არსებულმა ღვინის ქარხნებმა 104 მილიონი ლარის ყურძენი ჩაიბარეს.  2019 წელს შესყიდული ყურძნის ღირებულება 80 მილიონი ლარი, 2018 და 2017 წლის სუბსიდია კი 40–40 მილიონი ლარი იყო. შესაბამისად, სუბსიდირების ზრდასთან ერთად ბაზარზე სახელმწიფო ჩარევაც მზარდია. პარალელურად კი სახელმწიფოს მარაგებში სუბსიდიის შედეგად შესყიდული და გადამუშავებული სპირტის მარაგები იზრდება, კერძო სექტორი კი ამ სპირტის შესაძენად, ჯერჯერობით, დიდ ინტერესს არ გამოხატავს.

 „კომერსანტმა“ დეტალური ინფორმაციისთვის ქონების მართვის ეროვნულ სააგენტოს მიმართა, ბოლო 2 წლის განმავლობაში ჩატარებული აუქციონების რაოდენობასა და შედეგებთან დაკავშირებით. მიღებულ მონაცემებს კომერსანტი მოგვიანებით შემოგთავაზებთ. 

კომერსანტი