NATO-ს გენერალური მდივნის იენს სტოლტენბერგის განცხადებით, თუ ფინეთი და შვედეთი ალიანსში გაწევრიანებას მოისურვებენ, NATO მათ გადაწყვეტილებას მიესალმება. ამის შესახებ ინფორმაციას, სტოლტენბერგის განცხადებაზე დაყრდნობით სააგენტო Reuters ავრცელებს.

„რა თქმა უნდა, ეს მათი გადასაწყვეტია, მაგრამ თუ ისინი ამ ნაბიჯს გადადგამენ, ველი, რომ 30-ვე მოკავშირე მას დაეთანხმება“, – აღნიშნა ალიანსის გენერალურმა მდივანმა სამშაბათს, 5 აპრილს გამართულ პრესკონფერენციაზე. მისივე განმარტებით NATO საბოლოო რატიფიცირებამდე შუალედური პერიოდისთვის სავარაუდოდ ამ ქვეყნებისთვის უსაფრთხოების გზებს გამოძებნის.

ეკონომიკურად 2 მაღალგანვითარებული სახელმწიფო ფინეთი და შვედეთი სამხედრო ალიანსში გაწევრიანებისგან ბოლო დრომდე თავს იკავებდნენ, თუმცა რუსეთის უკრაინაში შეჭრამ ჰელსინკსა და სტოკჰოლმში პოლიტიკოსები სხვანაირად დააფიქრა, განწყობები NATO-ს სასარგებლოდ მოსახლეობის რიგებშიც შეიცვალა.

უკრაინაში ჩავარდნილი ბლიც-კრიგის მიუხედავად რუსეთის ფედერაციის საბჭოში განაცხადეს, რომ ფინეთის გადაწყვეტილებამ შესაძლოა ის რუსეთის მორიგ სამიზნედ აქციოს.

ფინეთთან სამხედრო კონფლიქტი რუსეთისთვის სასიამოვნო გასახსენებელი ნამდვილად არ უნდა იყოს. 1939 წელს სტალინის სურვილმა მოეხდინა ფინეთის სრული ანექსია ფიასკო განიცადა. ცოცხალ ძალასა და შეიარაღების რაოდენობას შორის არსებულ წარმოუდგენელი კონტრასტის მიუხედავად, ფინეთმა ტერიტორიის 11% დაკარგა, მაგრამ სახელმწიფოებრიობა შეინარჩუნა. 240 000 ჯარისკაცს 760 000-ის წინააღმდეგ მოუწია ბრძოლა, 32 ტანკს 6540-ის წინააღმდეგ, 114 თვითმფრინავს 3880 თვითმფრინავი უპირისპირდებოდა, მაგრამ თუ ფინეთმა 25 000 ჯარისკაცი დაკარგა საბჭოთა მხრიდან მსხვერპლმა 165 000-ს გადააჭარბა.

დღეს ფინეთში შემოსავალი 1 სულ მოსახლეზე $49 000-ს აღწევს, რუსეთში $10 200-ს, სიცოცხლის საშუალო ხანგრძლივობა ფინეთში 82.5 წელია (ქალებისთვის 85.1 და კაცებისთვის 79.8) ხოლო რუსეთში 73 წელი (ქალებისთვის 78.2-და და კაცებისთვის 67.6-ს).

გიორგი ელიზბარაშვილი