სტომატოლოგიური მასალისა და სადიაგნოსტიკო საშუალების რეალიზატორი აღარ არის ვალდებული დააკმაყოფილოს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს  მიერ აღიარებულიკარგი სადისტრიბუციო პრაქტიკის (GDP) სტანდარტი, რომელიც 2022 წლის 1 იანვრიდან მოქმედებს. ამის შესახებ მიმდინარე წლის 18 ივლისის დადგენილებაშია აღნიშნული.

„2022 წლის 1 იანვრამდე სსიპ − სამედიცინო და ფარმაცევტული საქმიანობის რეგულირების სააგენტოში წარდგენილ საბითუმო რეალიზაციის შეტყობინებას დაქვემდებარებული საქმიანობა (გარდა სტომატოლოგიური მასალისა და სადიაგნოსტიკო საშუალებების საბითუმო რეალიზაციისა), GDP (კარგი სადისტრიბუციო პრაქტიკის) სტანდარტთან შესაბამისობის სერტიფიკატის გარეშე, ექვემდებარება შეზღუდვას 2022 წლის 30 ივნისიდან, იმ შემთხვევაში, თუ შეტყობინება წარდგენილ იქნა იანვარში, თებერვალში, მარტში, აპრილში ან მაისში (შეტყობინების წარდგენის წლის მიუხედავად), ხოლო დანარჩენ თვეებში წარდგენილი შეტყობინებების მიმართ შეზღუდვის ვადად განისაზღვრება იმ თვის ბოლო რიცხვი, რომელ თვეშიც განხორციელდა შეტყობინება. სსიპ − სამედიცინო და ფარმაცევტული საქმიანობის რეგულირების სააგენტო უზრუნველყოფს საბითუმო რეალიზაციაზე შეტყობინებას დაქვემდებარებულ სუბიექტებზე ინფორმაციის განთავსებას საკუთარ ოფიციალურ ვებგვერდზე.

დადგენილება ამოქმედდეს გამოქვეყნებისთანავე და გავრცელდეს 2022 წლის 30 ივნისიდან წარმოშობილ ურთიერთობებზე“, — აღნიშნულია პრემიერ-მინისტრის დადგენილებაში.

„ფარმაცევტთა ასოციაციის“ აღმასრულებელი დირექტორი ილონა კოკიაშვილი „კომერსანტთან“ ამბობს, რომ ფარმაცევტული კომპანიებისთვის სერთიფიცირების პროცესი მიმდინარეობს და სამედიცინო და ფარმაცევტული საქმიანობის რეგულირების სააგენტო შესაბამის სერთიფიკატებსაც გასცემს.

ცნობისთვის, 2022 წელს ფარმაცევტული საწარმოები და საბითუმო დისტრიბუტორები ვალდებულნი არიან, მიმოქცევაში არსებული მედიკამენტების ხარისხის უზრუნველყოფის მიზნით, GMP და GDP სტანდარტი დანერგონ. GMP/GDP სტანდარტის დანერგვით საქართველო აღიარებს ევროკავშირის სტანდარტებს ფარმაცევტული პროდუქტების ხარისხის კონტროლის მიმართულებით.