რამდენიმე თვის წინ, ენგურის ხიდის აფხაზეთის მხარეს დაბეგვრისგან თავისუფალი ვაჭრობის პუნქტი Duty Free გაიხსნა. მაღაზიაში მოხვედრა მხოლოდ აფხაზეთიდან გამსვლელებს შეუძლიათ საპასპორტო შემოწმების გავლის შემდეგ.

 რუსული Дьюти Фри Альянс-ის ფილიალმა Апсны Дьюти-მ ენგურის ხიდთან, სოფელ ჭუბურხინჯში უბაჟო მაღაზიის მშენებლობის ნებართვა გასული წლის 31 აგვისტოს მიიღო. ახლა აფხაზეთ-სამეგრელოს ადმინისტრაციული საზღვრის კვეთისას საპასპორტო კონტროლის ჯიხურების წინ ერთსართულიანი თეთრი ფერის შენობა დგას. მაღაზიას მაღალი ფანჯრები აქვს, შენობას დიდი წითელი ასოებით ინგლისურად აწერია: DUTY FREE.

 ყველა პროდუქტს ეტიკეტზე ფასი ევროში აქვს მითითებული, თუმცა გადახდა მხოლოდ რუსული რუბლით შეიძლება. ანუ თუ ჯიბეში ან საბანკო ბარათზე ლარი, ევრო, დოლარი ან სხვა ვალუტა გაქვთ, Apsny Duty-ში ვერაფერს იყიდით. ფულის იქვე, მაღაზიაში გადახურდავება შეუძლებელია. ამიტომ, ვისაც რუბლი არ აქვს, მხოლოდ დახლების დათვალიერებას უნდა დასჯერდეს და აფხაზურ დიუტი ფრის ხელცარიელს დატოვებს.

 ადგილობრივები რადიო თავისუფლებასთან ამბობენ, რომ დიუტი ფრის სიგარეტებს ვერც აფხაზური და ვერც ქართული მხარის მიერ კონტროლირებად ტერიტორიაზე ვერ გადაიტანენ.

 ახლა ამ მაღაზიიდან რამდენიმე ნაბიჯში დაბეგვრისგან თავისუფალი ვაჭრობის კიდევ ერთი პუნქტი შენდება. ეს აფხაზეთში მეხუთე უბაჟო მაღაზია იქნება, სამი ფსოუს გამშვებ პუნქტზე მოქმედებს.

ვრცლად www.radiotavisupleba.ge