აგრარული სფეროს სპეციალისტების ინფორმაციით, სუპერმარკეტებში წარმოდგენილი ხილ-ბოსტნეულის უმეტესობა სტანდარტს ვერ აკმაყოფილებს. ამის მიზეზად ტექნოლოგიური ჩამორჩენა მიიჩნევა.  თუმცა პრობლემაა იმპორტულ პროდუქტთან დაკავშირებითაც. ვისაც ბოლო პერიოდში თუნდაც ერთხელ მაინც შეუძენია ქსელურ მარკეტებში აგრარული პროდუქტი, აუცილებლად დაადასტურებს, რომ  ხარისხის დაბალი დონე  ვიზუალურადაც შესამჩნევია.

გარდა იმისა, რომ რაოდენობრივად საქართველოში საკმაოდ მცირე პროდუქტი იწარმოება, მისი ჩანაცვლება შემდეგში ხდება უხარისხო იმპორტული ნაწარმით.

გლობალურ პრობლემაზე საუბრობს აგრარული სფეროს სპეციალისტი, მეცნიერი კობა კობალაძე. მისი განცხადებით, პროდუქტის ხარისხს განსაკუთრებული ყურადღება უნდა ექცეოდეს, რადგან უხარისხო საკვები იგივე საწამლავია, რასაც ადამიანებისთვის დიდი ზიანის მოტანა შეუძლია.

,,საქართველოში აგროწარმოება ძალიან დაბალ დონეზეა. შეიძლება ითქვას, ჩვენ თითქმის არ ვაწარმოებთ პროდუქტს, გავხედოთ, დახლებზე ძირითადად უცხოური სურსათი იყიდება. აშშ-მ მიიღო ერთ-ერთი ასეთი გაფრთხილება ,,დადგენილება 200“, სადაც შესაძლებლობად აღიარეს, რომ ამა თუ იმ ქვეყნის განადგურება, კონკრეტულად, მოსახლეობის მატების შემცირება და სხვა, შესაძლებელია ჰუმანიტარული წესით და იაფი სასურსათო პროდუქციის შეტანის გზით. თვითონ მიიღეს მთელი ზომები, რომ ქვეყნის შიგნით ფაქტობრივად არ შესულიყო მსგავსი პროდუქცია. სურსათი განიხილება როგორც წამალი, მაგრამ ამავე დროს, არის საწამლავიც, რომელიღაც ქვეყნის და ერის წინააღმდეგ იყენებენ. ამიტომ სურსათის უსაფრთხოებას განსაკუთრებული ყურადღება უნდა მიექცეს. უნდა ვიცოდეთ, რა იყიდება დახლებზე და რა გავლენა შეუძლია მოახდინოს ადამიანის ჯანმრთელობაზე, განსაკუთრებით, რეპროდუქციულ უნარზე. აქცენტი აქეთკენ არის აღებული, რადგან მოსახლეობის რაოდენობამ მოიმატა. ადამიანის გამრავლების უნარის რეგულირება სწორედ ამ მეთოდით არის შესაძლებელი, თუკი აშშ თავის მოსახლეობას უფრთხილდება, ჩვენც ამ მიმართულებით სერიოზული ღონისძიებები უნდა გავატაროთ“, - აცხადებს კობა კობალაძე.

მეცნიერი ვარაუდობს, რომ ქვეყანაში დიდი რაოდენობით  უხარისხო პროდუქტი შემოდის, მიუხედავად იმისა, რომ  ადგილზე ბევრი ნადგურდება,  არც თუ ცოტა ხვდება  დახლებზეც, რაც სამწუხარო რეალობაა. 

აღნიშნულს მოწმობს  EastFruit -ის კვლევა, რომელიც  2021 წლის მარტში გამოქვეყნდა. ორგანიზაციამ პოსტსაბჭოთა რამდენიმე ქალაქში, ქსელურ სუპერმარკეტებში ხილ-ბოსტნეულით ვაჭრობის საკითხები შეისწავლა და რამდენიმე კრიტერიუმი გამოყო: პროდუქციის ასორტიმენტი, ხარისხი, მომსახურეობა, პერსონალის კომპეტენტურობა, ფასები, უვარგისი პროდუქციის წილი და ა.შ.

აღმოჩნდა, რომ თბილისის სუპერმარკეტებში ხილ-ბოსტნეულის ხარისხი საკმაოდ დაბალია. მიზეზად დასახელებულია ის ფაქტი, რომ ქართველი ფერმერები და გლეხები პროდუქციის შენახვის ტექნოლოგიებს ჯერ კიდევ არ ფლობენ. გარდა ამისა, სუპერმარკეტების ნაწილი ნაკლებად ხარისხიან პროდუქციას შეგნებულად იბარებენ შედარებით დაბალი ფასის გამო.

კვლევამ ცხადჰყო, რომ საქართველოში თითქმის არავინ მუშაობს ოპტიმუმის ფორმატში ანუ, მისაღები ხარისხი და დაბალი ფასები, რომელიც მომხმარებელთა მოზიდვის საუკეთესო საშუალებაა. ასე რომ ქართული რითეილის ბაზარზე ეს ნიშა ჯერ კიდევ აუთვისებელია.

მარი ჩიტაია