მარცვლეულისა და მცენარეული ზეთების მსოფლიო ფასის შემცირების გამო, საკვები პროდუქტების საბითუმო ფასები ზედიზედ 12 თვეა იკლებს. FAO-ს სურსათის ფასების ინდექსი 2023 წლის მარტში 126,9-ს შეადგენდა, რაც წინა თვესთან 2,1%-ით და 2022 წლის მარტის პიკთან შედარებით 20,5%-ით ნაკლებია, ამის შესახებ FAO-ს (გაეროს სურსათისა და სოფლის მეურნეობის ორგანიზაცია) პუბლიკაციაშია
საუბარი.
FAO-ს ცნობით, იმპორტზე მოთხოვნის შემცირებამ და შავი ზღვის მარცვლეულის ინიციატივის გახანგრძლივებამ ფასების კლებას შეუწყო ხელი.
„მიუხედავად იმისა, რომ ფასები გლობალურად შემცირდა, ისინი კვლავ ძალიან მაღალია და შიდა ბაზრებზე ზრდას განაგრძობს, რაც დამატებით გამოწვევებს ქმნის სასურსათო უსაფრთხოებისთვის. ეს განსაკუთრებით ეხება განვითარებად ქვეყნებს, რომლებიც სურსათის წმინდა იმპორტიორებს წარმოადგენენ. სიტუაციას ამძაფრებს მათი ვალუტის გაუფასურება აშშ დოლართან ან ევროსთან მიმართებაში და მზარდი ვალი“, - თქვა მაქსიმო ტორერომ, FAO-ს მთავარმა ეკონომისტმა.
FAO-ს მარცვლეულის ფასების ინდექსი 5.6%-ით შემცირდა თებერვალთან შედარებით, ხორბლის მსოფლიო ფასი - 7.1%-ით, რაც გამოწვეულია ავსტრალიური ძლიერი წარმოებით, გაუმჯობესებული თესვის პირობებით ევროკავშირში, რუსეთიდან ძლიერი მიწოდებით და უკრაინიდან ექსპორტით. სიმინდის მსოფლიო ფასი 4,6%-ით შემცირდა.
FAO-ს მცენარეული ზეთის ფასების ინდექსი 3.0%-ით დაბალია წინა თვესთან შედარებით და 47.7%-ით დაბალი 2022 წლის მარტის მაჩვენებელთან შედარებით, რადგან უხვი გლობალური მარაგები და გლობალური იმპორტის დაქვეითებულმა მოთხოვნამ გამოიწვია სოიას, რაფსის და მზესუმზირასი ზეთების ფასები.
FAO-ს რძის პროდუქტების ფასების ინდექსი მარტში 0,8%-ით დაეცა.
ამის საპირისპიროდ, FAO-ს შაქრის ფასის ინდექსი თებერვლიდან 1,5%-ით გაიზარდა 2016 წლის ოქტომბრის შემდეგ უმაღლეს დონემდე, რაც ასახავს შეშფოთებას ინდოეთში, ტაილანდსა და ჩინეთში წარმოების პერსპექტივების გაუარესების შესახებ.
FAO ხორცის ფასების ინდექსი ოდნავ 0,5%-ით გაიზარდა.