საქართველოში სურსათის და სასმელი პროდუქტების იმპორტი ისტორიულ მაქსიმუმზეა. „საქსტატის“ მონაცემებით, 2022 წელს ქვეყანაში პროდუქციის იმპორტის მაჩვენებელი, წლიურად 42%-ით გაიზარდა. თუმცა, ტოპ იმპორტიორი კომპანიების უმეტესობა რუსეთში, აზერბაიჯანში ან ოფშორულ ქვეყნებში რეგისტრირებულ ორგანიზაციებს უკუთვნის. შესაბამისად, მათ მიერ მიღებული მოგება, საქართველოს ეკონომიკის ნაცვლად, ქვეყნის გარეთ გაედინება.
„კომერსანტი“ გთავაზობს TOP 10 სურსათის და სასმელი პროდუქციის იმპორტიორ კომპანიებს, 2021 წლის მოგების მაჩვენებლის და მფლობელების მიხედვით:
• შპს „ინტრეიდი“ - 16.1 მლნ. ლარის მოგება. კომპანია ეკუთვნის სააქციო საზოგადოება ნიკორას, დირექტორი კი თამარ ჯერენაშვილია. თავის მხრივ სს ნიკორას აქციათა უმეტესობის მფლობელი ვასილ სუხიაშვილი (1,876,471 აქცია), რუსეთის მოქალაქე ოლეგ გუბანოვი (1,035,293 აქცია) და დავით დუმბაძე (695,589 აქცია) არიან.
• შპს აგარის შაქარი - 13.7 მლნ ლარის მოგება. კომპანიის 51% შპს „ანატოლია თრეიდ კომპანის“ (აზერბაიჯანი) ეკუთვნის, 24.497% - შპს „უნივერსალ კაპიტალ გრუპს“ (აზრბაიჯანი), 16.335% - ნირეზოუნ საქართველოს, ხოლო 8.168% - „ანატოლია ჰოლდინგ კომპანი ლიმიტედს (არაბთა გაერთიანებული საამიროები). აგარის შაქრის დირექტორი კი აზერბაიჯანის მოქალაქე ალხან ალიზადაა.
• შპს კასკო 2015 - 8.4 მლნ. ლარის მოგება. კომპანიის 70%-ის მფლობელია ლევან კაჭარავა, 30%-ის ლევან ჭიორელი. კომპანიის დირექტორია მამუკა მინდიაშვილი.
• შპს „ქართული სადისტრიბუციო-მარკეტინგული კომპანია“ - 8.2 მლნ ლარის მოგება. კომპანიის 59.787% ეკუთვნის შპს „არევაკო ინვესთმენთს ლიმითიდს“ (კვიპროსი), 37.213% - შპს „ალპფორდიო სერვისიზს“ (კვიპროსი), ხოლო 3% - დავით ალავიძეს, რომელიც კომპანიის დირექტორია.
• შპს „გ.დ. ალკო“ - 7.7 მლნ ლარის მოგება. კომპანიის 57% ეკუთვნის შპს „მანდალორ ლიმითიდს“ (კვიპროსი), 18% - შპს „ალპფორდიო სერვისიზს“ (კვიპროსი), 12% - შპს „არევაკო ინვესთმენთს ლიმითიდს“ (კვიპროსი), 5%-5% სიმონ ესართიას და ლევან ლანდიას, ხოლო 3% - დავით ალავიძეს, რომელიც კომპანიის დირექტორია.
• შპს „კადევე საქართველო“ - 7.5 მლნ ლარის მოგება. კომპანიის მესაკუთრეა რუსეთში რეგისტრირებული სს „კადევე“, დირექტორი კი ბესარიონ ჭანტურიაა.
• შპს „დაფნა“ - 6.3 მლნ ლარის მოგება. კომპანია ეკუთვნის აზერბაიჯანულ „ანადოლუ ინვესთმენთ კომპანის“. დირექტორი კი აზერბაიჯანის მოქალაქე ვუგარ არაბოვია.
• შპს „ჰავი ლოჯისტიკს“ - 3.2 მლნ ლარის მოგება. კომპანია ეკუთვნის გერმანიაში რეგისტრირებულ შპს „ჰავი გლობალ ლოჯისტიქს“. დირექტორები არიან გერმანიის მოქალაქე ქრისტიან ნოვაკი და რუსეთის მოქალაქე ალექსეი კაშირინი.
• შპს „მეტეორი“ - 1.6 მლნ ლარის მოგება. კომპანიის მფლობელი და დირექტორია მალხაზ კლაჯეიშვილი.
• შპს „ვიმ-ბილ-დან საქართველო“ - 2020 წლის მონაცემების მიხედვით, კომპანიის ზარალი 18 მლნ ლარი იყო, შემოსავალი კი 121 მლნ ლარს აჭარბებდა. რეესტრის მიხედვით, კომპანია ეკუთვნის რუსულ სს „ვიმ-ბილდანს“, დირექტორი კი კონსტანტინე მერკვილაძეა.
საქართველოს სტატისტიკის ეროვნული სამსახურის მონაცემებით, 2022 წელს ქვეყანაში 1.533 მლრდ აშშ დოლარის პროდუქტი შემოვიდა, რაც რეკორდული მაჩვენებელია, 2021 წლის იმპორტი 1.079 მლრდ დოლარი იყო.