ჟოლოსა და კენკრის მწარმოებელი ფერმერების დიდი ნაწილი გაკოტრდა, ბაღები გაჩეხა, ან მიატოვა - ამის შესახებ, ,,ბიზნესპრესნიუსს“ ფერმერმა, თეა ქუთათელაძემ განუცხადა.

მისი თქმით, მიზეზი სახელმწიფოს მხრიდან არასწორი საპროექტო პირობები იყო. არასწორად შერჩეული რეგიონი, დაზიანებული ნერგები და სარწყავი წყლის არა არსებობა.

,, პროექტს, ,,დანერგე მომავალის“ ფარგლებში კენკრის ბაღების გაშენება თავიდანვე მოხდა არასწორად. პროექტითვე იყო გათვალისწინებული, რომ მარნეულში უნდა ყოფილიყო გაშენებული, იქ, სადაც კლიმატს ვერცერთ შემთხვევაში ვერ გაუძლებდა. გვთხოვდნენ მიწის ანალიზის პასუხებს, რამდენად შეთავსებადი იყო ლანდშაფტთან კულტურები და ესეც წარვადგინეთ, მაგრამ იქაც დიდი შეცდომები დაიშვა. რეკომენდაცია მოგვცეს გაგვეშენებინა, როგორც შემდეგ გაირკვა მიუხედავად არა თავსებადობისა. ლიმონი რომ გორში გააშენო, იგივეა. ამას დაემატა ტექნიკური მხარეები, ღია გრუნტში უნდა მოგვეყვანა და შესაბამისად, ვერ გაუძლო ვეგეტაცია შეწყვიტა და განადგურდა ბაღები.

მიუხედავად ამისა, პიარი არ შეწყვიტეს და ხალხი აშენებდა ბაღებს. პირველივე წელს ბაზარი გაჯერდა. როცა სამინისტროს ამის შესახებ ვუთხარით, რომ ფერმერები უკვე ვეღარ ვახდენდით რეალიზაციას, ისინი აგრძელებდნენ და მეტიც, 100%-იანი საგრანტო პროგრამა დაამატეს. შესაბამისად, პროექტის არასწორმა პირობებმა და ჭარბმა მოსავალმა ბაზრის განადგურება დაიწყო. იმის სურვილით, რომ პროექტი წარმატებულად წარმოეჩინათ, ხალხი დაღუპეს. პრობლემა იყო სარწყავი წყალი. პროექტის მიხედვით 500 მეტრში უნდა ყოფილიყო ეს პირობა ყველამ დავაკმაყოფილეთ, მაგრამ მერე აღმოჩნდა, რომ ეს თეორიული დაშვება იყო და სინამდვილეში, იმ არხებში წყალი არ არის და შემდეგი 5 წელიც არ იქნება. ტენდერი დღემდე არ გამოცხადებულა. ჭაბურღილის გაკეთება კი, ის თანხა ღირს, რასაც ფერმერი ვერ ამოიღებს.

შედეგად, ჟოლო მთლიანად განადგურებულია, მაყვალი კი დასუსტებულია. მთავარი პრობლემა თავში იყო, ნერგები რაც მოგვცეს, ნერგის ამონაყარი იყო. მთავარი მასალა იყო არასწორი. სანერგეები ჯერ კიდევ არ არიან მწყობრში და ალბათ, 5-10 წელი დასჭირდება ამის გამართვას. ანუ უკუღმა დაიწყეს. ვისაც ვიცნობ, უმეტესობამ ბაღები გაჩეხა ან მიატოვა, რადგან გაჩეხვაც ფინანსებთანაა დაკავშირებული. ალბათ, 1-2 ბაღი არსებობს. კენკრის ასოციაცია აწარმოებს კვლევას და მათი თქმით, 200-ზე მეტი ფერმერი გამოიკითხა, გაჩეხილია მაყვლის ბაღების 28% და ჟოლოს ბაღების 20%. ახლა, საკითხვია რამდენია მიტოვებული“ - განაცხადა თეა ქუთათელაძემ

წყარო: ,,ბიზნესპრესნიუსი“