სწორედ ახლა არის დრო და აუცილებლობა რეზერვების შევსების, — ამის შესახებ „კომერსანტთან“ ფინანსისტმა მიხეილ თოქმაზიშვილმა საქართველოს ოფიციალური საერთაშორისო რეზერვების მოცულობის 4.63 მილიარდ დოლარამდე გაზრდის შედეგებზე საუბრისას განაცხადა.

მისი თქმით, რაც უფრო დიდი რაოდენობით რეზერვი აქვს ქვეყანას, მით უფრო სტაბილურია ის, რადგან საჭიროების შემთხვევაში ფინანსური მდგრადობის განსამტკიცებლად გამოიყენებს. 

„საერთაშორისო რეზერვების შევსება ახლა განპირობებული არის იმით, რომ მყარდება ლარის კურსი და ეროვნულ ბანკს აქვს შესაძლებლობა უცხოურ ვალუტაში რეზერვები გაზარდოს. ამას ეკონომიკური თვალსაზრისით აქვს ის მნიშვნელობა, რომ რაც უფრო მეტია რეზერვი, ქვეყანა უფრო სტაბილურია და საჭიროების შემთხვევაში მას შეუძლია ეს გამოიყენოს ისევ და ისევ ფინანსური სტაბილურობის განსამტკიცებლად. მაგალითად, როგორც მოხდა პანდემიის დროს. რეზერვების შესავსებად კარგი პერიოდია, სწორედ ახლა არის დრო და აუცილებლობა რეზერვების შევსების. ერთის მხრივ, იგი ამცირებს ლარის კურსის რყევადობას და მის სწრაფად გამყარებას, რაც განპირობებულია სხვადასხვა ფაქტორით, მათ შორის იმ ფაქტორით, რომ მოთხოვნა ეროვნულ ვალუტაზე გაიზარდა, ანუ შემოვიდა საკმაოდ დიდი რაოდენობის დოლარი და მეორეს მხრივ, იმისათვის რომ ეს პროცესი დინამიურად წარიმართოს, ეროვნული ბანკი ინტენსიურად ახდენს ამ რეზერვების ყიდვას და ლარის გამოშვებას. ლარის გამოშვებას აქვს თავისი პლუსი, ის ასტიმულირებს ეკონომიკას, თუმცა ფასების მაღალ დონეს საწინააღმდეგო ქმედება გააჩნია, ამიტომ ამ ორ ურთიერთსაწინააღმდეგო მოქმედებაში ზომიერი პოზიციის დაცვა უნდა იყოს სებ-ის მთავარი მიზანი. ერთის მხრივ მან უნდა უზრუნველყოს ფულის ღირებულების დაცვა, ფასების შემცირება და მეორეს მხრივ ეკონომიკის სტაბილურობა და მისი სტიმულირება“, — აღნიშნავს მიხეილ თოქმაზიშვილი.

ეროვნული ბანკის მიერ გამოქვეყნებული სტატისტიკის მიხედვით, ნოემბერში რეზერვების ზომა 251 მილიონი დოლარით გაიზარდა და მან რეკორდულად დიდ მოცულობას მიაღწია. ეს მაჩვენებელი 708 მლნ დოლარით მეტია წინა წლის ანალოგიურ პერიოდთან შედარებით. საქართველოს სავალუტო რეზერვების დაგროვების დინამიკა ბოლო რამდენიმე თვეა მნიშვნელოვნად იზრდება, ივნისის შემდეგ რეზერვების ზომა 500 მილიონი დოლარით არის გაზრდილი.

ეროვნული ბანკის ინფორმაციით, საქართველოს სავალუტო რეზერვები განთავსებულია სუვერენულ ბონდებში (აშშ-ის, ავსტრალიის, კანადის, შვედეთის და სხვა სახაზინო ვალდებულებები); სუპრანაციონალური ფასიან ქაღალდებში (European Investment Bank, Bank for International Settlements, African Development Bank, Asian Development Bank Manila, EUROFIMA Basel, International Finance Corporation და ა.შ.); სააგენტოს ფასიან ქაღალდებში (Bank Nederlandse Gemeenten Den Haag, CPPIB Capital Inc Toronto, CDP Financial In Montreal, Agence Francaise de Developpement Paris, Kreditanstalt fuer Wiederaufbau Frankfurt, Svensk Exportkredit AB Stocholm, Royal Bank of Canada, Kommuninvest I Sverige AB Orebro, Province of Alberta Canada, Korean Development Bank და სხვა).