ნიუ ვიჟენის საუნივერსიტეტო ჰოსპიტალს პაციენტი ეთია ჭიკაძე კოვიდ კლინიკის რეგულირების დარღვევაში ადანაშაულებს. როგორც პაციენტი ფეისბუქის პირად გვერდზე წერს, ამბულატორიულ პაციენტს თავისუფლად შეუძლია, რომ კოვიდ კლინიკაში მოხვდეს და კოვიდპაციენტებთან შეხება ჰქონდეს. ის თავად სწორედ შემთხვევით აღმოჩნდა ასეთ გარემოში.
“კომერსანტი“ პაციენტის პოსტს უცვლელად გთავაზობთ:
“კიდევ ვინ მოვნიშნო? ვისაც ეს გეხებათ… სწორია როცა ამბულატორიული პაციენტი კოვიდ კლინიკის ფოიეში თავისუფლად ხვდება და ისიც არ იცის სად მოხვდა? ჩვეულებრივ მივედი New Vision University Hospital - ნიუ ვიჟენ საუნივერსიტეტო ჰოსპიტალი კლინიკაში,როგორც რიგითი პაციენტი ამბოლატორიულ კვლევაზე. შესასვლელში 3 ლიფტია-ერთი თანამშრომლებისთვის, მეორე კოვიდ პაციენტებისთვის, მესამე ამბოლატორიული პაციენტისთვის. გამოკრულია ნიშნულები, სადაც რამოდენიმე სართულს აწერია კლინიკის სახელი (არანაირი მინიშნება, რომ მეექვსე სართული არის კოვიდ კლინიკა. მაინც თავის დაზღვევის მიზნით ვეკითხები დაცვას რომელ სართულზეა ნიუ ვიჟენი და მპასუხობს, რომ მეექვსეზე. ამბულატორიული პაციენტის ლიფტით, ყოველგვარი ჩიპისს გარეშე ვხვდები მეექვსე სართულზე, სადაც რათქმაუნდა ფოიეში არავინ არ არის, მაგრამ ღიაა ყველა ფლიგელის შესასვლელი კარი. ვაღებ ფლიგელს და ვხედავ პალატებია, გუმანი მკარნახობს, რომ რამე ისე ვერაა ვბრუნდები სასწრაფოდ და უკვე მეორე ფლიგელის ღია კარში ხმამაღლა ვყვირი იქნებ ვინმემ გამომხედოს. ვიპოვე ექთანი, რომელიც მეუბნება, რომ ეს კოვიდ სართულია და მე წელიწადნახევარი კოვიდის შიშით სახლში გამოკეტილი თავქუდმოგლეჯილი გავრბივარ. შევდივარ მენეჯერთან, რომ ავუხსნა, რომ შესაძლოა ნებისმიერი პაციენტი მოხვდეს ასე კოვიდიანებში, ჩემგან განსხვავებით შეიძლება სხვა მაგდენსაც ვერ მიხვდეს და ბოლომდე გავიდეს ადამიანის ძებნაში ფლიგელის ბოლოს და ჰოი საოცრებავ მენეჯერი ქალბატონი მეკითხება, რატომ მოვხვდი ამბულატორიული პაციენტის ლიფტით, ყოველგვარი ჩიპის გარეშე ჯერ კოვიდ სართულზე და მერე სრულად ღია კოვიდ კლინიკაში. მე რომ ეხლა კოვიდი დამემარგოს ვინაა პასუხისმგებელი? ვინმეს აქვს გაზომილი რა კონცენტრაციაა ამ სართულზე ასე ღიად რომაა მიტოვებული? და საერთოდ მე რომ 2 წელია ყველანაირ რეგულაციას ვიცავ და ამის წყალობით კოვიდი არ შემხვედრია რატომ მაყენებს კლინიკა თავისი უპასუხისმგებლობით რისკის ქვეშ”, - წერს ეთია ჭიკაძე.
“კომერსანტი” ეთია ჭიკაძეს პირადად დაუკავშირდა, როგორც მან ჩვენთან საუბრისას აღნიშნა, სახლში ჰყავს მცირე წლოვანი შვილი, გარდა ამისა აქვს ჯანმრთელობის პრობლემები, მშობიერობის შემდეგ დარჩა მაღალი D დიმერი, რის გამოც მისთვის კორონავირუსით დაინფიცირება მძიმე შედეგის მომტანი იქნება.
“იმის გამო, რომ მეშინია კორონავირუსით დაინფიცირების და ვუფრთხილდები ყველაზე მთავარს სიცოცხლეს ძალიან ბევრ საკმაოდ მაღალანაზღაურებად პროექტებზე ვთქვი უარი და ჩავიკეტე სახლში ჩემი დანაზოგის ამარა. არ ვმუშაობ მხოლოდ იმიტომ, რომ არ მინდა ბავშვს რამე მოვუტანო, ასევე ვარ თრომბოფილიპი, ანუ ვითრომბები. ვზივარ წამალზე და ჩემთვის კორონა იქნება ალბათ მომაკვდინებელი. ვარ უაქტიურესი ადამიანი და კორონავირუსი აღმოჩნდა ერთადერთი, რამაც მე სახლში დამსვა“, - აღნიშნა ეთია ჭიკაძემ.