ტურიზმის სფეროს პოპულარიზაციისთვის, სახელმწიფო მილიონობით ლარს ხარჯავს, საქართველო კი, სწრაფად მზარდი ქვეყნების რეიტინგში ვერ მოხვდა.
მსოფლიო ტურიზმის ორგანიზაციის მიერ გამოქვეყნებულ რეიტინგს ტრაგიკულად არ მიიჩნევს „ჰელისკი ჯორჯიას“ დამფუძნებელი ვატო ასათაშვილი. როგორც მან „კომერსანტს“ განუცხადა ტურისტულად სწრაფად მზარდი ქვეყნების სიაში მოსახვედრად აუცილებელია ქვეყანა აფიქსირებდეს ორ ნიშნულიან პროცენტულ ზრდას საქართველომ კი წინა წელთან შედარებით მაჩვენებელი 7.1%-ით გაზარდა. „ჰელისკი ჯორჯიას“ დამფუძნებლის თქმით ქვეყანა, რომ ორნიშნა მაჩვენებელზე ავიდეს, საჭიროა გამართული ინფრასტრუქტურა.
„მოსასვენებელი ადგილები არსად არ ვარგა. თბილისშიც კი ცუდი მდგომარეობა გვაქვს ამ მხრივ, ქალაქგარეთ კი საშინელებაა. ზამთრის კურორტებზე ხომ ლაპარაკი ზედმეტია, პარკინგები და შიდა გზები საერთოდ არ გაგვაჩნია. მაგალითად, წყლის პრობლემა რომელიც წელს ზამთრის კურორტზე გამძაფრებული სახით იყო, ყოველთვის არსებობდა.უბრალოდ, წელს კარგად გამოჩნდა, რადგან ვიზიტორთა რაოდენობამ მოიმატა და მიწოდება მოთხოვნას ვეღარ გაწვდა.“-ამბობს ვატო ასათაშვილი.
გარდა ამისა, „ჰელისკი ჯორჯიას“ დამფუძნებლს სავალდებულოდ მიაჩნია, ტრანსპორტირების სისტემის აწყობა და ლოჯისტიკურ ჰაბად საქართველოს გარდაქმნა. მისი თქმით, ამ მიმართულებას თითქმის არ ექცევა ყურადღება. ჰაბი ქვეყანაში გააქტიურებს და განავითარებს მცირე ბიზნესს, რაც ქვეყნის თვითგანვითარების გარანტიაა.
ვატო ასათაშვილი ტურიზმის სფეროს პოპულარიზაციაზეც საუბრობს და სახელმწიფოს მეტი პასუხისმგებლობისკენ მოუწოდებს. „ტურიზმის მიმართულებით, მარკეტინგული ღონისძიებები უნდა იყოს მეტად კონკრეტული.რასაც ახლა სახელმწიფო აკეთებს არის რუტინული სამუშაო, რომლისთვისაც 30-35 მილიონ ლარს გამოყოფენ წლიურად და როგორც უნდა ისე განკარგავენ. შედეგი კი არ გვაქვს.“-ამბობს ვატო ასათაშვილი.
შეგახსენებთ, რომ მსოფლიო ტურიზმის ორგანიზაციამ, 4 თებერვალს სწრაფად მზარდი ტურისტული მიმართულებების რეიტინგი გამოაქვეყნა. საქართველო 2019 წლის ყველაზე სწრაფად მზარდ ტურისტულ მიმართულებებში ვერ მოხვდა.
მაგალითისთვის, სომხეთი მე-12 ადგილზეა და გასულ წელს 14,4%-იან ზრდას აჩვენებს ტურიზმის სექტორში. აზერბაიჯანი მე-17 ადგილს იკავებს, თურქეთმა კი მე-13 ადგილი დაიკავა და ტურიზმის სექტორის 14%-იანი ზრდა აჩვენა.
ნათია ლომიძე