„გადავწყვიტეთ სამართლებრივ დონეზე საერთოდ ავკრძალოთ K2 კოეფიციენტით მანიპულაციები“ – კახა კალაძემ „ურბანული ქაოსის დასრულება“ 2019 წელს დააანონსა და K2 კოეფიციენტების გაყიდვა აკრძალა. ინტენსიური განაშენიანების კოეფიციენტი განხილვის საკითხი კიდევ ერთხელ გახდა. დედაქალაქის მერი ამჯერად დაუსრულებელი მშენებლობის პრობლემის მოგვარებას ცდილობს და სამშენებლო კომპანიებს k2–ის დავალიანების ეტაპობრივად გადახდას სთავაზობს. საუბარია 2019 წლამდე გაცემულ ნებართვებზე.
ცვლილება „ადგილობრივი მოსაკრებლების შესახებ“ საქართველოს კანონში უნდა შევიდეს. კანონპროექტი უკვე საქართველოს პარლამენტშია. განმარტებითი ბარათის მიხედვით ირკვევა, რომ თბილისის მასშტაბით, 25 პირია, რომელსაც k2–ის მოსაკრებელი არ გადაუხდია. დავალიანების ჯამური ოდენობა კი დაახლოებით 7,9 მილიონ ლარს შეადგენს. იმ შემთხვევაში თუ პარლამენტი კანონპროექტს მხარს დაუჭერს, ბიზნეს ოპერატორების თანხის გადახდა 2025 წლის 1 იანვრამდე შეეძლებათ.
კანონპროექტის ერთ-ერთი ავტორი და ინიციატორი ბექა დავითულიანია. დეპუტატი „კომერსანტთან“ საუბარში აცხადებს, რომ ინიციატივა გაჩერებული მშენებლობების პრობლემის მოგვარების მიზნით შემუშავდა. მისი თქმით, ესენი არიანი კომპანიები, რომელსაც მოსაკრებლის გადახდა რიგი მიზეზების გამო ბოლო წლებში გაუჭირდათ, ცვლილებათა პაკეტი კი დავითულიანის განმარტებით, მათ ერთგვარ შანსს აძლევს, რომ სახელმწიფოს წინაშე არსებული ვალდებულებები გაისტუმრონ. მედიაჰოლდინგის კითხვაზე სხვა ბიზნეს ოპერატორებთან მიმართებითებით, რომლებიც ფინანსურ ვალდებულებებს ასრულებდნენ, რამდენად სამართლიანია მიღებული გადაწყვეტილება, დეპუტატი გვპასუხობს, რომ პრობლემის მოგვარების სხვა გამოსავალი არ არსებობს.
„2007 წელს, როდესაც K2 კოეფიციენტის შეძენა სპეციალური შეთანხმების შედეგად, გარკვეული საფასურის სანაცვლოდ გახდა შესაძლებელი, საფასური ნებართვის აღების წინ უნდა გადაგეხადა. გარკვეული პერიოდის შემდეგ, გადახდის ფორმა შეიცვალა და მოსაკრებლის განწილვადება გახდა შესაძლებელი. თუმცა, განწილვადების გრაფიკი უნდა ყოფილიყო არა უმეტეს 2020 წლამდე. ვინაიდან არის დარჩენილი კომპანიები, რომელთაც შენობები აშენებული აქვთ, თუმცა თანხა ჯერ კიდევ არ აქვთ გადახდილი, ამას პანდემიის საკითხიც დაერთო და პრობლემები შეექმნათ, ამიტომ დაგვიდგა ეს საკითხი დღის წესრიგში. დედაქალაქში 25 კომპანიაა, რომელსაც ეს თანხა გადასახდელი აქვს. ვფიქრობთ, პარლამენტს შევთავაზოთ ამ ადამიანებს გადახდის გრაფიკი გადაუწიონ. რაღაც თვალსაზრისით, იმ წუთში ვინც გადაიხადა იმისთვისაც ფინანსური თვალსაზრისით მოსაკრებელი შეიძლება მძიმე ტვირთი იყო, მაგრამ ახლა ვდგავართ იმ მოცემულობის წინაშე რომ შეგვიძლია არ გავუნაწილოთ და ამ თანხების ამოღება დავიწყოთ სხვა მეთოდებით, რომელიც ამ კომპანიებსაც დააზარალებს და საბოლოო ჯამში შეიძლება ამ თანხის მობილიზება ვერ მოხდეს და დაგვრჩეს ეს პრობლემა პრობლემად. მგონი პრობლემის აღმოსაფხვრელად ყველაზე ოპტიმალური გზა ეს არის. ამ კომპანიებს მშენებლობები დაწყებული აქვთ, ჩვენ დაუსრულებელი მშენებლობების საკითხს სხვადასხვა მიმართულებით ვეხმარებით, რომ პრობლემა რაღაცნაირად აღმოვფხვრათ. ერთ- ერთი მეთოდი არის განწილვადების ვადის გახანგრძლივება, რათა ბოლომდე მიიყვანონ და ჩააბარონ მეპატრონეებს თავიანთი სახლები. ზოგიერთ მშენებლობა დასრულებულიც აქვთ, უბრალოდ ჩაბარება ვერ ხდება, რადგან თანხა არ აქვს გადახდილი. სხვა გამოსავალი ამ წუთში უბრალოდ არ არსებობს“, - განაცხადა ბექა დავითულიანმა.
აღსანიშნავია, რომ დეველოპერულ სექტორს აღნიშნულ საკითხზე საუბარი არ სურს, თუმცა „კომერსანტი“ საკითხზე მუშაობას აგრძელებს უახლოეს მომავალში გაგაცნობთ, თუ როგორი იყო დედაქალაქში K2 კოეფიციენტის გაყიდვების სტატისტიკა და რა შემოსავალი მიიღო თბილისის ბიუჯეტმა ქალაქის დამახინჯებით და ქაოსური განაშენიანებით.
ბაჩო ადამია