“საქართველოს მეფუტკრეთა გაერთიანების” აღმასრულებელი დირექტორის, ალეკო პაპავას განცხადებით, თაფლის ექსპორტი მაისიდან განახლდება. როგორც პაპავამ მედიაჰოლდინგ “კვირას” პრეს-კლუბში გამართულ პრესკონფერენციაზე განაცხადა, წელს ექსპორტზე , შესაძლოა, 500 ტონამდე თაფლი გავიდეს.

“ევროკავშირში თაფლის ექსპორტი შეჩერდა. აქ ძირითადად საუბარია დიდ პარტიებზე, 10-20 ტონაზე. პატარ-პატარა პარტიები გადის. ევროკავშირი ჩვენგან, ძირითადად, აკაციის თაფლს ითხოვს. ქვეყანაში უკვე მარაგები ამოიწურა. ბოლო, 20-ტონიანი პარტია საფრანგეთში. თებერვლის თვეში გავიდა. ველოდებით მაისის თვეს, ახალი თაფლის დაწურვას და დიდი პარტიების ექსპორტიც განახლდება.

2021 წელს ექსპორტზე დაახლოებით 180 ტონა თაფლი გავიდა, აქედან 90%- ზე მეტი ევროკავშირში. 2022 წელს 250 ტონაზე მეტი, აქაც 90 %-ზე მეტი ევროკავშირის ქვეყანაში. საექსპორტო ქვეყნებში, ძირითადად, წარმოდგენილი იყო: საფრანგეთი , ბულგარეთი, ნორვეგია. წელს უფრო მეტი თაფლის ექსპორტს ველოდებით. ჩემი ვარაუდით, ეს დაახლოებით 500 ტონამდე იქნება. მთავარია ამინდები, კლიმატური პირობები. თუ თაფლოვანი მცენარეების ბაზას გავაუმჯობესებთ, მაგალითად, აკაციისას, კიდევ უფრო უკეთესი იქნება. მეტი რაოდენობის თაფლი გვექნება.

ძირითადად, ასეა: თავიდან პატარ- პატარა პარტიები გადის. როცა უკვე ჩვენს თაფლს დააგემოვნებენ, მოსწონთ და დიდ პარტიებს ითხოვენ . მაგალითად, იაპონიაშიც ასე იყო. იქ ცოტა გართულებულია შეტანა, თავიანთი რეგულაცია აქვთ, იმპერატორის დადასტურება სჭირდება, მაგრამ ჩვენი ბიოთაფლი რომ შევიდა, ისე მოეწონათ, რომ უკვე, ფაქტობრივად, ასე ვთქვათ, ჩვენი ბიოთაფლი მთლიანად იაპონიაში გადის. ძირითადი დაინტერესებული ქვეყნებია: იაპონია, კანადა, ისინი, ვინც ბიოპროდუქტებზე არიან ორიენტირებულები . ევროკავშირი , ძირითადად, აკაციის თაფლზეა ორიენტირებული , მაგრამ დაინტერესება წაბლის თაფლზეც იქნება. სამწუხაროდ, შარშანდელი წელი უხვნალექიანი იყო, წაბლის ყვავილობას წვიმები დაემთხვა და შესაბამისად, იმ რაოდენობის თაფლი ვერ მივიღეთ, რომ საექსპორტო პოტენციალი ჰქონოდა. წელს, იმედია, კლიმატური პირობები გაუმჯობესდება და ჩვენს ექსპორტს წაბლის თაფლიც დაემატება.

ევროკავშირში თაფლი ისე არ იგზავნება, რომ საქართველოს ლაბორატორიებში არ შემოწმდეს. ამის შემდეგ გერმანიის, საფრანგეთის, იტალიის, ან ბულგარეთის ლაბორატორიებში მაინც გადის შემოწმებას . ევროკავშირს ყველაზე მკაცრი მოთხოვნა აქვს. ჩვენი თაფლის 90 % ევროკავშირში გადის, შესაბამისად, მათ მკაცრ მოთხოვნებს ვაკმაყოფილებთ. ახლა ჩვენი მიმართულება იქითკენაა, რომ ბიოსტანდარტებსა და წარმოებაზე რაც შეიძლება მეტად გადავერთოთ. საქართველოში დაახლოებით 3 000 ტონა თაფლი იწარმოება და აქედან ბიოსერთიფიკატი, რომელსაც შეიძლება, მივცეთ 3 ტონა თაფლია”- განაცხადა პაპავამ.