ინფლაციისა და ფულადი სახსრების უკმარისობის გამო, თალიბანის მთავრობამ შეამცირა იმპორტის გადასახადები სურსათის ძირითად პროდუქტებზე.
ავღანეთი ხშირად ებრძოდა სურსათის ფასების ზრდას დეფიციტისა და მიწოდების ჯაჭვის პრობლემების გამო, რაც მთავარ პრობლემას უქმნის თალიბებს. ქვეყანა დიდწილად დამოკიდებულია იმპორტსა და ჰუმანიტარულ დახმარებაზე.
ავღანეთს სურსათის ნახევარზე მეტი მეზობელი ქვეყნებიდან, კერძოდ პაკისტანიდან, ყაზახეთიდან და უზბეკეთიდან შემოაქვს. ქვეყანა ასევე არის ბრინჯის მნიშვნელოვანი იმპორტიორი და ყოველწლიურად დაახლოებით 600 000 ტონა ბრინჯს მოიხმარს.
გადასახადების თავიდან არიდების მიზნით, იმპორტირებული პროდუქტის ნაწილი ქვეყანაში კონტრაბანდული გზით შედის. თალიბანი მუშაობდა კორუფციის შესაჩერებლად, რის შედეგადაც შემოსავალი გასულ თვესთან შედარებით გაორმაგდა.
თუმცა, ზამთრის მოახლოებასთან ერთად თალიბანსა და ავღანეთს ბევრი საფრთხე ემუქრება. გაეროს 25 ოქტომბრის მოხსენებაში ნახსენები იყო, რომ ავღანეთის მოსახლეობის ნახევარზე მეტი მომავალი თვიდან მწვავე შიმშილის წინაშე აღმოჩნდებოდა, რაც გაღრმავებული ეკონომიკური კრიზისით არის გამოწვეული.
გაეროს სურსათისა და სოფლის მეურნეობის ორგანიზაციამ განაცხადა, რომ 22,8 მილიონი ადამიანი შიმშილის რისკის ქვეშ არის, რაც 37%-ით აღემატება აპრილის შეფასებას, ვიდრე თალიბანი ხელისუფლებაში მოვიდოდა.
პრობლემის გადასაჭრელად, თალიბებმა მიმდინარე კვირას პროგრამა “საკვები სამუშაოსთვის” გამოაქვეყნეს. სოფლის მეურნეობის, ირიგაციისა და მეცხოველეობის სამინისტროს განცხადებით, გეგმა 40 000 ადამიანის დასაქმებას ითვალისწინებს, რომლებიც ანაზღაურების სახით ხორბალს მიიღებენ.
საერთაშორისო თანამეგობრობა დათანხმდა დახმარების გაწევას გაერთიანებული ერების ორგანიზაციის მეშვეობით, რადგან არ არსებობს მტკიცე კონსენსუსი თალიბანთან ურთიერთობის შესახებ. შეერთებულმა შტატებმა და მისმა მოკავშირეებმა არაერთხელ განაცხადეს, რომ ავღანეთის მთავრობის მიმართ დამოკიდებულება განიხილება ქმედებებით და არა სიტყვებით.
ავღანეთისთვის ჰუმანიტარული დახმარების გაწევას გეგმავს ჩინეთი. პეკინის მთავრობა მოუწოდებს აშშ-სა და დასავლეთის ქვეყნებს, გააუქმონ სანქციები და რაციონალურად და პრაგმატულად ჩაერთონ თალიბებთან მოლაპარაკებაში.
Financial Times-ის ინფორმაციით, ადამიანის უფლებების ლობირებისა და ჰუმანიტარული დახმარების მიზნით, ევროკავშირი ქაბულში დიპლომატიური ოფისის გახსნას განიხილავს.
წყარო: Bloomberg, "ბიზნეს ფორმულა"