ჩვენი მიზანია, როგორც კი გაჩნდება ბაზარზე ხელმისაწვდომი ადაპტირებული ვაქცინა, ჩვენს მოსახლეობასაც ჰქონდეს ამ ვაქცინაზე წვდომა, - ამის შესახებ თამარ გაბუნიამ „ქრონიკაში“ განაცხადა. ჯანდაცვის მინისტრის მოადგილის თქმით, საქართველო კორონავირუსის საწინააღმდეგო ვაქცინების ახალი პარტიების შესაძენად აგრძელებს თანამშრომლობას Pfizer-თან და Covax-პლატფორმასთან.

„12 წლამდე ასაკობრივ ჯგუფში Pfizer-ს აქვს განსაკუთრებული, განსხვავებული კონცენტრაციის ვაქცინა, რომელიც შედარებით დაბალი დოზით შეიცავს აქტიურ ნივთიერებას და მისი გამოყენებაა რეკომენდებული. ამ მიმართულებითაც მიდის მუშაობა. ასევე, ბუნებრივია გავაგრძელებთ თანამშრომლობას Covax-ის პლატფორმასთან. ვაქცინები, რომელთა გამოსვლაც მოსალოდნელია უახლოეს პერიოდში არის Novavax-ი, მაგალითად. არის სხვა ვაქცინებიც, რომლებიც ახლა ადაპტირდება ახალ შტამებთან მიმართებაში. იგივე შეეხება Pfizer-ის ვაქცინას და, ბუნებრივია, ყველა ამ მიმართულებით მიმდინარეობს მუშაობა“, - განაცხადა გაბუნიამ.

მისივე თქმით, მანამდე ვაქცინაცია ქვეყანაში არსებული პრეპარატებით უნდა გაგრძელდეს. მინისტრის მოადგილემ განმარტა, რომ ამ ეტაპზე საქართველოში აცრა Pfizer-ის, Sinopharm-ისა და Sinovac-ის ვაქცინებით არის შესაძლებელი. ჩინური პრეპარატებს გამოყენების ვადა 2023 წლის ბოლომდე აქვს, ნაწილის კი 2024 წელზე გადადის.

imedinews.ge