ჯანდაცვის მინისტრის მოადგილის, თამარ გაბუნიას განცხადებით, მიმდინარეობს მუშაობა იმის თაობაზე, რომ არ მოხდეს ე.წ. მწვანე საშვის გაყალბება და ამისთვის კონკრეტული მექანიზმები ამოქმედდეს.
როგორც მან საკოორდინაციო საბჭოს დღევანდელი სხდომის დასრულების შემდეგ ჟურნალისტებს განუცხადა, როგორც კი საბოლოოდ ჩამოყალიბებული სურათი იქნება, ეს გადაწყვეტილება დაუყოვნებლივ ძალაში შევა.
„რაც შეეხება „მწვანე“ საშვის კონცეფციას, ეს გარკვეულწილად არის არაპირდაპირი რეგულირება და სავალდებულო მოთხოვნა პარამეტრების, რაც აღწერს პირის ეპიდუსაფრთხოების სტატუსს, ეს არის ვაქცინაცია, ანტიგენ ტესტირება ყოველდღიურ რეჟიმში ან პსრ ტესტირება 72 საათიან რეჟიმში, ასევე გადატანილი ინფექცია 14-დღიდან 6 თვის ინტერვალში. ამ შემთხვევაში, ამ 3 პარამეტრიდან ერთ-ერთი ნიშნავს იმას, რომ პირი შეიძლება ჩაერთოს უსაფრთხოდ სოციალურ აქტივობებში. ბევრი ქვეყანა ამას უკვე იყენებს. ადმინისტრირების ნაწილში მნიშვნელოვანია ის, რომ ვიდრე მოხდება ამ მექანიზმის აღიარება და სავალდებულო სახით ქვეყანაში დანერგვა, ვსაუბრობ „მწვანე“ საშვის მექანიზმზე, მნიშვნელოვანია ასევე ყველა პირობა იყოს შექმნილი იმისთვის, რომ აღსრულების ნაწილში არ შეიქმნას შეფერხებები და ამან არ გამოიწვიოს გარკვეული სახით ფალსიფიკაცია. ერთი სერტიფიკატის ნაწილი და მეორე, იმ წესის დარღვევით, რომელსაც დავაწესებთ. ამიტომ, ბიზნესმა მზაობა უნდა გამოხატოს ამასთან დაკავშირებით. „მწვანე“ საშვის გარეშე მომხმარებელი ვერაფრით მოხვდება იმ გარემოში, სადაც ბიზნესაქტივობა წარმოებს. ასევე ზუსტად უნდა იყოს შრომის ინსპექციის მხრიდან მექანიზმები და გარანტიები, რომელიც მოგვცემს იმის საშუალებას, რომ აღსრულება შესაბამისად მოხდეს. მანამდე, ნებისმიერ შემთხვევაში, ეს მხოლოდ ფორმალობა იქნება. ამ გარანტიებზე მიდის ახლა მუშაობა და როგორც კი საბოლოოდ ჩამოყალიბებული სურათი გვექნება, ეს გადაწყვეტილება არ დააყოვნებს“, - განაცხადა გაბუნიამ.
ipn.ge