თამბაქოს ნაწარმის სტანდარტიზებული შეფუთვის ვალდებულების ამოქმედება შესაძლოა, გადავადდეს. შესაბამისი კანონპროექტი პარლამენტში უკვე ინიციირებულია და თუ დეპუტატების სათანადო მხარდაჭერას მოიპოვებს, დამტკიცდება კიდეც.

როგორც bpn-ი წერს, პროექტის თანახმად, 2022 წლის 31 დეკემბრიდან იკრძალება თამბაქოს ნაწარმის რეალიზაცია/განლაგება სტანდარტიზებული შეფუთვის გარეშე. აღნიშნული შეზღუდვა მიზნად ისახავს თამბაქოს ნაწარმისადმი მიმზიდველობის შემცირებასა და თამბაქოს შეფუთვის საშუალებით თამბაქოს რეკლამირების და პოპულარიზაციის შემთხვევების აღმოფხვრას.

კანონპროექტის მიზანი მომავალში პოტენციური მწეველების რაოდენობის შემცირებაა.

„იყო ხოლმე მცდელობა თამბაქოს ინდუსტრიიდან, რომ თავიდან დაეწყოთ ამ საკითხების განხილვა და გადაევადებინათ, თუმცა ამ მხრივ კომპრომისი ნაკლებად მიიღეს პარლამენტის მხრიდან, რადგან ყველას კარგად გვაქვს გააზრებული თვითონ ამ სტრატეგიის სწორი შესრულების მნიშვნელობა.

რაც შეეხება ამ ცვლილების ეკონომიკურ ზეგავლენას, ამას პრაქტიკულად არ ექნება გავლენა, რადგან მწარმოებლები წინასწარ არიან გაფრთხილებული, რომ ამ შეფუთვაზე უნდა გადავიდნენ და სადა შეფუთვის ეს ფორმა, არ არის კორელაციაში აქციზებთან, ან რაიმე სხვა გადასახადებთან. ანუ, ბიუჯეტთან ამას პირდაპირი ზეგავლენა არ ექნება,“- აცხადებს პარლამენტის თავმჯდომარის მოადგილე დავით სერგეენკო.

აღსანიშნავია, რომ პარლამენტში ინიცირებული კანონპროექტი გულისხმობს, რომ ვალდებულება 2022 წლის 31 დეკემბრის ნაცვლად 2024 წლის 31 დეკემბრიდან ამოქმედდეს, რადგან პროექტის ავტორების განმარტებით, უკრაინაში მიმდინარე ომის გამო კომპანიებს მეტი დრო სჭირდებათ რომ გადაწყობა მოახერხონ.

რას ნიშნავს თამბაქოს სტანდარტიზებული შეფუთვა?

თამბაქოს სტანდარტიზებული, ანუ სადა შეფუთვა გულისხმობს პროდუქტის ვიზუალის გარდაქმნას ისე, რომ არ მოხდეს პროდუქტზე ბრენდის ლოგოს ან ბრენდთან ასოცირებული გამოსახულების დატანა. „სტანდარტიზებული შეფუთვის“ მთავარი მიზანია, შეამციროს პროდუქტის მიმზიდველობა და გაზარდოს ჯანმრთელობის რისკების შესახებ გაფრთხილებების ხილვადობა.