ეროვნულ გალერეაში 27 აპრილს გაიხსნა გამოფენა, რომელიც მოიცავს ნამუშევრებს კერძო კოლექციებიდან. თუ ვის ნამუშევრებს მასპინძლობს გალერეა და რამდენად არის შესაძლებელი, რომ თანამედროვე ქართული სახვითი ხელოვნების ენით ვესაუბროთ პროგრესულ სამყაროს? – ამ თემაზე რადიო „კომერსანტზე“ თავის საავტორო გადაცემაში „ბრენდი საქართველო“ ლევან კობერიძემ ხელოვნების კონსულტანტი ლიკა ჭკუასელი მიიწვია.

როგორც ლიკა ჭკუასელმა აღნიშნა, ის ბოლო 6 წლის განმავლობაში კერძო კოლექციონერებთან ერთად მუშაობდა და დღეს გალერეის ორ სართულზე გამოფენილია ის ნამუშევრები, რომელთა 50%-ზე მეტი ფართო საზოგადოებას არ უნახავს. გამოფენა ეროვნულ გალერეაში 27 მაისს დაიხურება.

„კერძო  კოლექციებში მოხვედრილი  ნამუშევრების ავტორები  ცნობილია, მაგრამ  არ  აქვთ  შესაძლებლობა, რომ ფართო საზოგადოებამ იხილოს, მაგალითად  ვერა ფაღავა,  რომელიც  ფანტასტიკური ფერმწერი  იყო და  ცხოვრობდა საფრანგეთში, მისი ნამუშევრები ჩვენ კოლექციაში არ არის, რამდენიმე წლის წინ ჩატარდა გამოფენა და მას შემდეგ მისი ნამუშევრების ნახვა ფართო საზოგადოებისთვის შესაძლებელი აღარ იყო.

Რაც შეეხება თვითონ არტისტების ცნობადობას, პირველ რიგში მინდა აღვნიშნო, რომ ოცხელის პერიოდის გენიოსები ჩვენივე მოქალაქეებმა  უფრო არ იციან,  ვიდრე ახალგაზრდები და  თანამედროვე ხელოვანები, იმიტომ რომ თანამედროვე არტისტებს ბოლო 5-6 წლის მანძილზე  ძალიან კარგად წარმოაჩენენ ის გალერეები, რომელიც 5-6 წლის მანძილზე შეიქმნა, მაგალითად  window project, art beat, maudi და სხვა. მაგრამ ისინი  წარმოადგენენ თანამედროვე ხელოვანებს,  აკეთებენ გამოფენებს, როგორც  თბილისში,  ისე  რეგიონებში, ასევე  მუშაობენ  საერთაშორისო  არტ ბაზრობებზე. ეს ძალიან კარგია, მაგრამ  იქიდან  გამომდინარე,  რომ თანამედროვე  ხელოვნების სახელმწიფო მუზეუმი  არ გაქვს, მხოლოდ ახლა  გახდა  შესაძლებელი, რომ ეროვნულ გალერეაში სხვადასხვა კურატორებმა თანამედროვე ხელოვანების გამოფენა მოაწყოს, აქამდე მათთვის ეს დაკეტილი  სივრცე იყო“, -  აღნიშნა ლიკა ჭკუასელმა.  

მისივე თქმით, თანამედროვე არტისტებთან ერთად ინტენსიურად მუშაობს, რომ შეიქმნას სივრცე, რომელიც თანამედროვე ხელოვნებისთვის იქნება ღია.

„პირველ  რიგში საჭიროა მორგებული ინფრასტრუქტურა, საგამოფენო სივრცეები, თავისი ყველაფრით, რაც  შესაძლებლობას მოგვცემს,  რომ  საინტერესო  ექსპოზიცია გავაკეთოთ, საჭიროა  ამის  დაფინანსება, რომელიც ძალიან მნიშვნელოვანია, რომ მოდიოდეს როგორც სახელმწიფოდან, ასევე კერძო სექტორიდან,  სამუზეუმო სივრცეები უნდა შეიქმნას ან არსებული მოერგოს  დღევანდელ  საჭიროებებს და შემდეგ  უკვე ვიმუშაოთ იმაზე, რომ ქართული ხელოვნების სელექცია გაკეთდეს და მათი ჩვენება საინტერესო ფორმით  მოხდეს. 

რატომღაც ჩვენნაირ ქვეყანაში ითლება, რომ ადამიანებს ხელოვნება ისე ძალიან არ სჭირდებათ, არ აინტერესებთ და არ უნდათ, მაგრამ ფაქტია, რომ ახალგახსნილ გამოფენაზე  რიგებია, რაც ქართულ მუზეუმში იშვიათად მინახავს. ანუ  რაღაც  გაცოცხლდა ამით, საინტერესო  ექსპოზიციაა და  როგორც ბავშვები ასევე დიდები მოდიან”, -  აღნიშნა ლიკა ჭკუასელმა.

კითხვაზე, თუ რამდენად არის გამოფენები  ერთის მხრივ შანსი და მეორეს მხრივ მოტივაცია იმ ადამიანებისთვის, ვინც  ამ პროფესიით  არიან  დაკავებულები და  თავის  ცხოვრების  გზად  აირჩიეს ხელოვნება, ლიკა ჭკუასელი პასუხობს, რომ  ბოლო 5-6- წლის  განმავლობაში შექმნილი ძალიან საინტერესო სივრცეები, 4710,  გალერეა არტ  ბითი,  ვინდოუ  პორჯექტი,  ელენე  აბაშიძის  shared  space,  მაუდი და სხვა სივრცეები ინტენსიურად  აკეთებენ  თანამედროვე  ხელოვნების  გამოფენებს და  ზოგ  მათგანს არტისტების ნამუშევრებს საერთაშორისო ბაზრებზე გააქვს.

„ასევე  ექსპოჯორჯიაში ხშირად  ტარდება არტ ბაზრობა, რომელიც ძალიან დიდი  შესაძლებლობაა, რომ  ქართველებმა  დაათვალიერონ  და იყიდონ  ქართველებისვე  ნამუშევრები ნახონ და გაიცნონ  ქართველების  შემოქმედება, ასევე  უცხოელებიც ჩამოდიან და მათ  შორის ხდება ინფორმაციის გაცვლა. Ააღსანიშნავია, რომ ბოლო წლებში  თანამედროვე  ხელოვნების საქმე  წინ  წავიდა“, - აღნიშნა ლიკა ჭკუასელმა.  

თაკო კვაჭანტირაძე