მსოფლიოსთვის ჯერ კიდევ ახალი, თანამედროვე ტექნოლოგიით ხელნაკეთი ხალიჩების შექმნა უკვე საქართველოშიც დაიწყო. ,,კარპეტერია“ ჯერ მხოლოდ ერთი თვეა რაც ბაზარზეა.

კომპანიის დამფუძნებელი მარიამ მარგიანი აცხადებს, რომ პროდუქტი ჯერ შიდა ბაზარზეა გათვლილი, მას შემდეგ კი რაც 100%-ით ქართული გახდება, ექსპორტის მიმართულებით დაიწყებს მუშაობას.

სტარტაპი, „აწარმოე საქართველოში“ მიკრო და მცირე მეწარმეთა გრანტების პროგრამის ფარგლებში დაფინანსდა.

"ბიუროკრატიული საკითხები გაზაფხულზე დასრულდა და ყველა პროცედურის გავლის შემდეგ, ერთი თვეა ბაზარზე გავედით და დავიწყეთ წარმოება. ახლა ვართ მცირე მეწარმეები და როგორ განვითარდება ბიზნესი, იმის მიხედვით შეიცვლება ჩვენი სტატუსიც. ჩვენი წარმოება მოიცავს, თანამედროვე ტექნოლოგიით ხელნაკეთი ხალიჩების შექმნას. ბიზნესის განვითარების გზად ვხედავთ არა მხოლოდ ხალიჩების, არამედ ინტერიერის სხვადასხვა დეტალების შექმნას და სპექტრის გაფართოებას. რადგან მცირე ბიზნესი ვართ, ინვესტიციაც შესაბამისად არ არის განსაკუთრებულად დიდი მოცულობის, აქედან 90% „აწარმოე საქართველოს გრანტია“. დასაწყისისთვის არ იქნება რეალისტური, რომ ექსპორტზე გასვლაზე გვქონდეს საუბარი, თუმცა საბოლოო მიზანი ესაა, მას შემდეგ, რაც მივაღწევთ, რომ პროდუქცია იქნება 100%-ით ქართული. ამ ეტაპზე არის დეტალები, რომლებიც უბრალოდ ვერ მზადდება საქართველოში. ახლა, ზუსტად ამ ეტაპზე ვართ და ვცდილობთ,გარკვეულ საწარმოებს დავუკავშირდეთ და ვაწარმოებთ მოლაპარაკებას, რათა დავუკვეთოთ პროდუქტი. ამის შემდეგ კი, რაც ჩვენი პროდუქცია იქნება 100%-ით ქართული დავიწყებთ ექსპორტის მიმართულებითაც მუშაობასაც. რეალურად, ეს ტექნოლოგია, არა მხოლოდ საქართველოსთვის, მსოფლიოსთვისაც ახალია. სულ რამდენიმე წელია, რაც დაწყო ამ ტექნიკით მუშაობა ხალიჩებზე და ახლა იკიდებს ფეხს. ექსპორტამდე, ვგეგმავთ, მოვიცვათ საქართველოს შედარებით დიდი ქალაქები და ასევე, რადგან ტექნოლოგია ახალია, ჩვენი ცოდნა გავუზიაროთ ონლაინ კურსების საშუალებით დაინტერესებულ ადამიანებს“- განაცხადა ,,კარპეტერიას“ დამფუძნებელმა.

წყარო: ,,ბიზნესპრესნიუსი“