„თბილღვინო“ სამხრეთ კორეის ბაზარზე შესასვლელად ემზადება, — ამის შესახებ კომპანიის დირექტორმა გიორგი მარგველაშვილმა გადაცემაში „ბიზნესი რუსთავი 2“- ზე ისაუბრა. მისი თქმით, სამხრეთ კორეასთან მოლაპარაკებები ფინალურ ეტაპზეა და „თბილღვინო“ სამხრეთ კორეის ბაზარზე წლის ბოლომდე უნდა გამოჩნდეს.
მარგველაშვილმა ასევე ბაზრების დივერსიფიკაციაზე ისაუბრა და თქვა, რომ აქცენტი არსებულ პარტნიორებზე და მათთან თანამშრომლობის გაფართოებაზე კეთდება.
„პირველ რიგში აქცენტი, არსებულ პარტნიორებზე და მათთან ურთიერთობის გაფართოებაზე კეთდება, სადაც ჩვენ ძლიერად ვართ წარმოდგენილები. ესენია, ყაზახეთი, ბალტიისპირეთი, პოლონეთი, დიდი ბრიტანეთი თვიდან თვემდე ახალ შესაძლებლობებს იძლევა. ჩვენ წელს ორ უმსხვილეს კომპანიასთან გავაფორმეთ ხელშეკრულება, ესენია უმსხვილესი სავაჭრო ქსელი weight rose და ძალიან დიდი კომპანია direct wines, რომელიც მსოფლიოში ღვინის მიწოდების მხრივ ლიდერია.
ჩვენ ძალიან კარგი პერსპექტივები გვაქვს აზიაში. ვაგვირგვინებთ მოლაპარაკებას მსხვილ კორეულ სავაჭრო ქსელთან. შესაბამისად ეს ახალი შესაძლებლობები გვიზრდის დიაპაზონს და ასპარეზს , რომელიც გვმატებს დამაჯერებლობას, რომ ჩვენი მასშტაბის კომპანია არსებობდეს რუსეთის ბაზრის გარეშე.
რაც შეეხება ჩინეთის ბაზარს, საკმაოდ დიდი ბაზარია, თუმცა მას თავისი სირთულეების აქვს,
ჩინეთშიც შევიძინეთ საინტერესო პარტნიორი, თუმცა ჩვენ გაცილებით უფრო დიდ პერსპექტივას ვხედავთ აზიიდან, კორეის და იაპონიის ბაზარზე, სადაც აქტიურ სამუშაოებს და მოლაპარაკებებს ვაწარმოებთ. ძალიან დიდი იმედი მაქვს, რომ კორეაში ქართულ ღვინო ბაზრის ძალიან დიდ წილს დაიკავებს, რადგან მომხიბვლელობის თვალსაზრისით კორეა მსოფლიოში მეათე ეკონომიკაა, მას აშშ-ს მერე ექსპერტები მეორე ბაზრად ასახელებენ“, - აღნიშნა გიორგი მარგველაშვილმა.
მარგველაშვილმა რუსეთის ბაზრის ჩანაცვლებაზეც ისაუბრა და აღნიშნა, რომ ეს თეორიულად შესაძლებელია და ამის გამოცდილება ქართულმა ბაზარმა მაშინ მიიღო, როდესაც 2006 წელს რუსეთმა ბაზარი ცალმხრივად ჩაკეტა.
„რეალურად ბაზარი ჩანაცვლებადია მაგრამ დღეს ისეთ მასშტაბებზე ვართ და იმდენად დამოკიდებულია ქართული ბაზარი რუსეთის ბაზარზე, რომ მთლიან ექსპორტი 60%-ი რუსეთში გადის. ამის ჩანაცვლება ძალიან მტკივნეული იქნება და ეს დროს მოითხოვს, მაგრამ პროცესი ეტაპობრივად დასაწყებია“, - აღნიშნა გიორგი მარგველაშვილმა.
როგორც „კომერსანტს“ ღვინის ეროვნულ სააგენტოში უთხრეს მიმდინარე წლის 9 თვეში საქართველოდან სამხრეთ კორეაში ექსპორტირებულია 50 ათასამდე ბოთლი ღვინო - ზრდა გასული წლის ანალოგიურ მონაცემზე 38%-ია.
სტატისტიკური მაჩვენებლების თანახმად, 2022 წლის იანვარ - აგვისტოში კორეაში 56,77 ათასი დოლარის ყურძნის ნატურალური ქართული ღვინოები, ცქრიალა ღვინის გარდა, გავიდა ექსპორტზე, ხოლო 2021 წელს საქართველომ კორეაში გაიტანა როგორც ყურძნის ცქრიალა ღვინოები, ასევე ყურძნის ნატურალური ღვინოები. უფრო კონკრეტულად საქართველოდან კორეაში 6,02 ათასი დოლარის ღირებულების ცქრიალა ღვინო გავიდა, ხოლო ნატურალური ღვინოების ექსპორტმა 400 .77 ათასი დოლარი შეადგინა.
თაკო კვაჭანტირაძე