ქალაქში სავაჭრო ცენტრების რაოდენობის გაზრდის ფონზე, მოლებს მოიჯარეების მოსაზიდად მეტი ძალისხმევა სჭირდებათ. მათი ნაწილი ცდილობს ფართებს სხვა დანიშნულება შესძინოს. „კომერსანტის“ ინფორმაციით, მათ შორისაა „თბილის მოლიც“, სადაც არსებობს იდეა, რომ ბოლო, მეოთხე სართულზე მაღაზიების ნაცვლად საოფისე ფართები განთავსდეს.
„თბილისი მოლში“ კომერსანტს კონკრეტული ცვლილების შესახებ არ დაუდასტურეს, თუმცა განაცხადეს, რომ ამ მიმართულებით აქტიური მუშაობა მიმდინარეობს.
„თბილისი მოლის“ ადმინისტრაციაში აცხადებენ, რომ სავაჭრო ცენტრის დატვირთულობის მაჩვენებელმა 1%-ით უკვე გადააჭარბა პანდემიამდელ მაჩვენებელს და ამ დროისთვის 85%-ია. უახლოეს მომავალში იგეგმება კვების ზონის გაფართოება და რამდენიმე გასართობი ობიექტის დამატება. „თბილისი მოლში“ ამბობენ, რომ საფასო პოლიტიკა ამ ეტაპზე შეცვლილი არ არის და ქირის განაკვეთი თითქმის ყველა მოლში ერთი და იგივეა.
რაც შეეხება კონკურენციას, „თბილისი მოლში“ აცხადებენ, რომ ამ ეტაპზე თბილისის ბაზარი სავაჭრო ცენტრებით საკმარისად გაჯერებული არაა და მომხმარებლის რაოდენობა ყველასთვის საკმარისია.
„თბილისი მოლში“ არის გარკვეული მაღაზიები, რომელიც მხოლოდ აქაა წარმოდგენილი, როგორიცაა Zara Home, Sunglass Hunt, Marks&Spencer და სხვები. ასევე უახლოეს მომავალში იგეგმება რამდენიმე ახალი ბრენდის დამატება. ზოგადად მოთხოვნა საკმაოდ გაზრდილია,“- აცხადებენ თბილისი მოლის ადმინისტრაციაში.
გასულ წლებში, აღმოსავლეთის ქვეყნებიდან ჩამოსული ტურისტების ტურისტულ პაკეტებში ერთ-ერთი ლოკაცია „თბილისი მოლიც“ იყო. კომერსანტი დაინტერესდა, პოსტპანდემიურ პერიოდში როგორია „თბილისი მოლში“ ტურისტული ნაკადი აღმოსავლეთიდან და იმოქმედა თუ არა ამაზე კონკურენციამ.
„ჩვენ ვთანამშრომლობთ ბევრი ქვეყნის ტურისტულ სააგენტოსთან და პერიოდულად ვუკეთებთ მათზე მორგებულ შეთავაზებებს, რაც ტურისტების მუდმივ ნაკადს უზრუნველყოფს. პანდემიის პერიოდში, ისე როგორც ყველგან, შემცირებული იყო ეს ნაკადი, თუმცა ამ ეტაპზე სრულად აღდგენილია,“ - აცხადებენ „თბილისი მოლში“.