თბილისში სავაჭრო ცენტრების რაოდენობის გაზრდის ფონზე, მოლებს მოიჯარეების მოსაზიდად უფრო მეტი ძალისხმევა სჭირდებათ. მოლების ნაწილში დატვირთულობის შემცირება შეინიშნება. „კომერსანტის“ ინფორმაციით, მათ შორისაა „თბილის მოლიც“, სადაც არსებობს იდეა, რომ ბოლო, მეოთხე სართულზე, სადაც დატვირთულობა ნაკლებია მაღაზიების ნაცვლად საოფისე ფართები განთავსდეს.

„თბილისი მოლში“  ფინანსურ პრობლემების არსებობას უარყოფენ, რაც შეეხება გასაქირავებელი ფართების რაოდენობას, „კომერსანტთან“ აღნიშნავენ, რომ სავაჭრო ცენტრი ამ ეტაპზე თითქმის 100%-ით დატვირთულია და მოთხოვნაც გაზრდილია.

„თბილისი მოლის სავაჭრო ბრუნვა და დატვირთულობა პანდემიამდე არსებულ რიცხვებს დაუბრუნდა. მოლი თითქმის 100%-ით შევსებულია, ფართებზე მოთხოვნა გაზრდილია, რაც შეეხება ქირის ფასს, საფასო პოლიტიკა ამ ეტაპზე შეცვლილი არ არის და ქირის განაკვეთი თითქმის ყველა მოლში ერთი და იგივეა.

მიმდინარეობს მუშაობა საინტერესო პროექტებზე და ახალ ბრენდებთან ვაწარმოებთ მოლაპარაკებებს, თუმცა კონფიდენციალური პოლიტიკის გამო ამ ეტაპზე მათ სახელებს ვერ გავასაჯაროვებთ“, — აცხადებენ „თბილისი მოლში“.

რაც შეეხება კონკურენციას, „თბილისი მოლში“ აცხადებენ, რომ ამ ეტაპზე დედაქალაქში სავაჭრო ცენტრები დიდი რაოდენობით არ არის, ამიტომ მომხმარებელი ყველასთვის საკმარისია. გარდა ამისა, მოლში არის რამდენიმე განსხვავებული ბრენდი, რომლებიც სხვა სავაჭრო ცენტრებში არ გვხვდება.