თბილისის ცენტრში სასტუმრო Hyatt Regency Tbilisi-ს ოპერირების დაწყების თარიღი ისევ უცნობია. რუსთაველის გამზირის #30-ში მდებარე იუსტიციის სამინისტროს ყოფილი შენობა „რუსთაველი ფროფერთიმ“ სახელმწიფოსგან 2012 წელს 13 მლნ ლარად შეიძინა.
როგორც „კომერსანტს“ „რუსთაველი ფროფერთის“ დირექტორმა მინდია გადაევმა უთხრა, კომპანიას ვადებთან დაკავშირებით ვალდებულებები არ გააჩნია და შესაბამისად კომპანიაც საკუთარი ბიზნესგეგმის და გათვლების მიხედვით ახორციელებს პროექტს.
„ჯერჯერობით პროექტის დასრულების ვადებს ვერ ვაზუსტებთ. კომპანიას პროექტის ვადებთან დაკავშირებით არავის წინაშე ვალდებულება არ გააჩნია. ამიტომაც საქმეს როგორც სჭირდება ისე მივყვებით.
ვნახეთ, რომ პანდემიამ სერიოზული დაღი დაასვა მაღალი კლასის სასტუმროებს. დღემდე, სტატისტიკას თუ გადახედავთ მოგზაურების სტატისტიკა კი გაიზარდა, შემოსავლებიც გაიზარდა, მაგრამ ამ სეგმენტში ჯერ კიდევ ვერ არის აღდგენილი სრულად. შესაბამისად, რომ გითხრათ, კარგი დრო არის დღეს - არა. ალბათ რამდენიმე წელიწადში გამოსწორდება და ბიზნეს მოგზაურების ვიზიტები საქართველოში გაიზრდება. შესაბამისად ჩვენც მაგ პერიოდისთვის მზად ვიქნებით“, - განუცხადა „კომერსანტს“ მინდია გადაევმა.
„რუსთაველი ფროფერთის“ ხელმძღვანელი ამბობს, რომ Hyatt Regency Tbilisi-ს პროექტის ფარგლებში, ამ ეტაპზე სამშენებლო სამუშაოები მიმდინარეობს.
„მიუხედავად პანდემიისა ჩვენ სამუშაოები არ გაგვიჩერებია. უფრო მეტიც, ძირითადი მშენებლობა პანდემიის დროს განხორციელდა და ე.წ. კონსტრუქციული სამუშაოები პრაქტიკულად დასრულებულია. დღეისათვის მიმდინარეობს სახურავის მოპირკეთების, თბოიზოლაციის, ფანჯრების დამზადების, ფასადების რეაბილიტაციის სამუშაოები“, ამბობს გადაევი.
მისი თქმით, Hyatt Regency Tbilisi 180 სასტუმრო ნომერზე გათვლილი სასტუმრო იქნება.
„თავდაპირველად სასტუმროს 170 ნომერზე გვქონდა გათვლა და როგორც ჩანს საბოლოოდ 180 სასტუმრო ნომერი იქნება. ეს არის მაღალი კლასის სასტუმრო ნომრები. ასევე სასტუმროს ბოლო სართულზე განთავსდება აუზი, ბარი და ორი რესტორანი, შეხვედრების ოთახი და შეხვედრების დარბაზი. ანუ რაც საჭიროა მაღალი კლასის სასტუმროსთვის ყველაფერი იქნება.
მშენებლობის დაწყებამდე Hyatt-თან საკმაოდ მჭიდრო კომუნიკაცია გვქონდა და ყველაფერი Hyatt-თან შეთანხმებით გაქვს შესრულებული“, აცხადებს „რუსთაველი ფროფერთის“ დირექტორი.
რაც შეეხება ინვესტიციას, პროექტის განხორციელება „რუსთაველი ფროფერთის“ დაახლოებით 60 მლნ დოლარი უჯდება.