თბილისის ისტორიული უბანში, მთაწმინდაზე, მრავალფუნქციური კომპლექსი აშენდება. 6 000 კვ.მ-ზე „ჰილტონის“ ბრენდის სასტუმროსა და საოფისე ბლოკის მშენებლობა იგეგმება. მასშტაბურ პროექტს შპს „სიტი პლაზა“ ახორციელებს. კომპანია ახლა დედაქალაქის მთავრობასთან ესკიზის შეთანხმებას ცდილობს. სამ უარის შემდეგ ინვესტორი არქიტექტურის სამსახურისგან დადებით პასუხს ელოდება. როგორც „კომერსანტს“ პროექტის მთავარმა არქიტექტორმა, შპს „არტსტუდიო პროექტის“ დამფუძნებელმა გიორგი სულაბერიძემ აცნობა, ისტორიულ საბჭოს შენობის მოცულობასთან და სიმაღლეებთან დაკავშირებით გარკვეული შენიშვნები ჰქონდა, რომელიც არქიტექტურულმა ოფისმა გაითვალისწინა. მისი თქმით, განახლებული პროექტი უკვე ატვირთულია.

არქიტექტორი გვიყვება, რომ პროექტზე მუშაობა დაახლოებით ერთი წლის წინ დაიყო. მისი თქმით, ტერიტორია დედაქალაქის ისტორიული უბნის მნიშვნელოვან არეალში, ინგოროყვას, ჩაიკოვსკის და იაშვილის ქუჩების გადაკვეთაზე მდებარეობს და ძველი თბილისისთვის დამახასიათებელი განაშენიანების მქონე შენობებითაა გარშემორტყმული. გიორგი სულაბერიძე ამბობს, რომ პროექტი, თავისი ადგილმდებარეობიდან და მასშტაბებიდან გამომდინარე, „არტსტუდიო პროექტისთვის“ ძალიან მნიშვნელოვანია. სწორედ ამიტომ, არქიტექტურულ ოფისში უნდათ, რომ თბილისს კიდევ ერთი, ღირშესანიშნავი შენობა შეემატოს.

„თავდაპირველად ნაკვეთზე პირველი სახანძრო რაზმის შენობა იყო თბილისში, რომელიც მთელ ქალაქს გადაჰყურებდა. შემდეგ ტერიტორიაზე ე.წ. ცეკას სასტუმრო უნდა აშენებულიყო, თუმცა პროექტი გაჩერდა და 30 წელია შენობის საძირკველია დარჩენილი.  ახლანდელი კონცეფციით გვინდა დაახლოებით ის კონფიგურაცია გავიმეორეთ, რაც ისტორიულ შენობას ჰქონდა. მოცემული ესკიზი წარმოადგენს ადგილის სახასიათო და ისტორიულ მეხსიერებაზე დაყრდნობით თანამედროვე შენობის მოცულობით გადაწყვეტას. გამოვიყენებთ იმ პარამეტრებს რაც მინიჭებული აქვს, რა თქმა უნდა ისტორიული განაშენიანების დაცვით. პროექტით გათვალისწინებულია 2 ბლოკის მშენებლობა. ერთი იქნება სასტუმრო, ალბათ ჰილტონი, ხოლო მეორე საოფისე ბლოკი, რომელთაც პარკინგი და საზოგადოებრივი შენობები გააერთიანებთ“, - გვიყვება გიორგი სულაბერიძე.

„არტსტუდიო პროექტის“ დამფუძნებელი ამბობს, რომ საოფისე და სასტუმროს შენობა დაყოფილია სხვადასხვა ფერის მოცულობებით, რაც, მისი თქმით, ასევე ეფუძნება სახანძრო რაზმის მუშაობის სპეციფიკასთან დაკავშირებულ ლეგენდას და ადგილის ისტორიულ ხასიათს გამოხატავს.

თბილისი, განსაკუთრებით ისტორიული ნაწილი, მრავალფერია. დიდი ყურადღება ფასებდებს და მათ ხარისხს დაეთმობა. შენობების ფერადოვანი ფასადი შესრულებული იქნება მაღალი ხარისხის სხვადასხვა შეფერილობის ტერაკოტას შეკიდული საფასადე სისტემით, რაც უზრუნველყოფს ჩადებული არქიტექტურული იდეის მაღალი ხარისხით შესრულებას. ასევე თვითონ სასტუმრო იქნება ძალიან მაღალი დონის. ჩვენი ვფიქრობთ, რომ მომავალში მიმდებარე შენობების რესტავრაცია დაიწყება, რა დროსაც საკმაოდ კარგი უბანი შეიქმნება“, - ამბობს არქიტექტორი.

პროექტის განხორციელებას 2-3 წელი დასჭირდება. მისი სავარაუდო საინვესტიციო ღირებულება კი დაახლოებით $30 მლნ იქნება.

რაც შეეხება შპს „სიტი პლაზას“, კომპანიის დირექტორი და 60% წილის მფლობელი აზერბაიჯანის მოქალაქე ტალეხ გასიმოვია, ხოლო 40% ასევე აზერბაიჯანის მოქალაქეს შამამა გასიმოვას ეკუთვნის.

ბაჩო ადამია