მიუხედავად პროგრამის პრიორიტეტად აღიარებისა, თბილისის მერიამ სატრანსპორტო ინფრასტრუქტურის მშენებლობა-აღდგენის პროგრამის ფარგლებში დაგეგმილი 205,257,835 ლარის ნაცვლად 183,481,984 ლარი დახარჯა. აღნიშნულის შესახებ ინფორმაციას მმართველობის მონიტორინგის ცენტრი (GMC) ბიუჯეტის 6 თვის შესრულების ანგარიშზე დაყრდნობით ავრცელებს. დოკუმენტი დედაქალაქის მერიამ თავად გამოაქვეყნა.
ანგარიშის თანახმად, მერიამ გამოყოფილი თანხების მხოლოდ 81%-ის ათვისება შეძლო.
„6 თვის განმავლობაში მერიას 781,691,359 ლარი უნდა დაეხარჯა, თუმცა რეალურად 633,558,914 ლარი დახარჯა. შესაბამისად მერიას აუთვისებელი დარჩა 148,132,444 ლარი.
ვინაიდან, დოკუმენტი საკმაოდ მოცულობითია, გადავწყვიტეთ, ყურადღება მხოლოდ სატრანსპორტო და ინფრასტრუქტურული პროექტების შესრულებაზე გაგვემახვილებინა.
2021 წლის ბოლოს კახა კალაძემ საზოგადოებას საკრებულოს მიერ დამტკიცებული 2022 წლის ბიუჯეტი წარუდგინა. ბიუჯეტი დაახლოებით 1.5 მლრდ ლარს შეადგენს. კახა კალაძემ ამავე ბრიფინგის დროს აღნიშნა, რომ ბიუჯეტის ყველაზე დიდი ნაწილი მოდის ორ პრიორიტეტულ მიმართულებაზე - ჯანდაცვა და სოციალური დაცვა და ასევე საგზაო და სატრანსპორტო ინფრასტრუქტურის განვითარება.
მიუხედავად პროგრამის პრიორიტეტად აღიარებისა, მერიამ სატრანსპორტო ინფრასტრუქტურის მშენებლობა-აღდგენის პროგრამის ფარგლებში დაგეგმილი 205,257,835 ლარის ნაცვლად 183,481,984 ლარი დახარჯა. შესაბამისად 21,775,850 ლარი. აუთვისებელი დარჩა“ GMC-ის მიერ გამოქვეყნებულ ინფორმაციაში.
სატრანსპორტო ინფრასტრუქტურის მშენებლობა-აღდგენის პროგრამა ორ ქვეპროგრამას მოიცავს:
საგზაო ინფრასტრუქტურის მშენებლობა, აღდგენა მოვლა-შენახვა;
ტრანსპორტის განვითარება.
„წლობით გაჭიანურებული და დაუსრულებელი პროექტების, თუ დაანონსებული და განუხორციელებელი პროექტების პირობებში, გასაკვირი არც არის რომ მერია ბიუჯეტს დროულად ვერ ითვისებს.
რაც შეეხება ტრანსპორტის განვითარებას, სამართლიანობისთვის უნდა ითქვას, რომ თბილისის მერის, კახა კალაძის ერთ-ერთი წინასაარჩევნო დაპირება ავტობუსების ჩანაცვლების შესახებ შესრულდა, რადგან დღეს ქალაქში ძველი, ყვითელი ავტობუსები აღარ გადაადგილდებიან, თუმცა ტრანსპორტის განვითარების ქვეპროგრამა, მხოლოდ ტრანსპორტის მოდერნიზაციას/განახლებას არ მოიცავდა.
ტრანსპორტის განვითარების ქვეპროგრამა საქალაქო სამგზავრო ტრანსპორტის მოძრავი შემადგენლობის მოდერნიზაციის გარდა, ისეთ მნიშვნელოვან საკითხებს მოიცავს, როგორიც არის სატრანსპორტო ინფრასტრუქტურის მოწესრიგების ღონისძიებები, მეტროს სადგურების რეკონსტრუქცია, მშენებლობა, საბაგირო ტრანსპორტის განვითარება, საქალაქო სამგზავრო ტრანსპორტის სუბსიდია.
რაც შეეხება თანხების ათვისებას, ტრანსპორტის განვითარების ქვეპროგრამის ფარგლებში მერიას 168,330,910 ლარი უნდა აეთვისებინა, საიდანაც მხოლოდ 149,888,495 ლარი დახარჯა. შესაბამისად აუთვისებელი დარჩა 18,442,414 ლარი.
საცობების პრობლემას თავად მერიაც აღიარებს. თბილისის მერმა მთავრობის სხდომაზე დედაქალაქში არსებული საცობების გამომწვევი ძირითადი მიზეზები დაასახელა და განმარტა, რომ თბილისში 12 პრობლემური კვანძია მოსაწესრიგებელი. ამავე სხდომაზე კახა კალაძემ აღნიშნა რომ ამჟამად საცობებთან დაკავშირებული დისკომფორტი არსებობს, თუმცა, თბილისისთვის და თბილისელებისთვის ყველაფერს გააკეთებს.
ბიუჯეტიდან თანხების დროულად და სრულად ათვისება განსაკუთრებით მნიშვნელოვანია თბილისში არსებული საცობების ფონზე“, — განმარტებულია GMC-ის სტატიაში.
წყარო: GMC
თბილისის მერია
