ამ ეტაპისთვის ქალაქ თბილისის მუნიციპალიტეტის ტერიტორიაზე 892 ოჯახია უსახლკაროდ რეგისტრირებული - ინფორმაცია ამის შესახებ დეპუტატ ალეკო ელისაშვილის კითხვის პასუხად თბილისი მერიამ გამოაქვეყნა.

თბილისის მერიის ცნობით 892 ოჯახიდან 267 იყო ერთსულიანი ოჯახი და შესაბამისად მოხდა თავშესაფრის შეთავაზება (ლილოს მიუსაფართა თავშესაფარი), 150 ოჯახი ცხოვრობს სოციალურ საცხოვრისში 3 ლოკაციაზე (დიდი დიღომი, ორხევი, ვარკეთილი), 55 ოჯახისთვის მოხდა ბინის შეძენა სხვადასხვა ლოკაციაზე (ბინები გადაეცათ სარგებლობის უფლებით), 69 ოჯახის შემთხვევაში საცხოვრისის გადაცემა არ განხორციელებულა სხვადასხვა მიზეზის გამო (მოხდა არსებული ფართის დაკანონება, გადაეცათ მიწის ნაკვეთი და ა.შ.). როგორც· ქ.თბილისის მუნიციპალიტეტის მერიაში აცხადებენ უსახლკარო ადამიანების დახმარების მიზნით შემუშავებულია რამდენიმე პროგრამა.

დეპუტატი სხვა ქალაქებში რეგისტრირებული უსახლკაროების რაოდენობითაც დაინტერესდა.

ბათუმის მერიისგან დეპუტატს ჯერჯერობით პასუხი არ მიუღია, ქუთაისის მერიის ინფორმაციით კი ქუთაისის მუნიციპალიტეტში დარეგისტრირებულია ბინის მაძიებელი 251 ოჯახი, 2 უპირობოდ შესასახლებელი და 25 მიუსაფარი პირი.