თბილისის სატრანსპორტო კომპანიამ ავტობუსების პარკის ასაშენებლად ტენდერი გამოაცხადა. შესყიდვის სავარაუდო ღირებულება 62 800 000 ლარია.


მუნიციპალური ავტობუსების პარკი თბილისში, ალექსეევკის დასახლებაში (აეროპორტის მიმდებარედ) უნდა აშენდეს.

შესყიდვა 3 აპრილს გამოცხადდა, წინადადებების მიღება 3 მაისს დაიწყება და 8 მაისს დასრულდება.

სამუშაოების შესრულების ვადად ხელშეკრულების გაფორმების თარიღიდან არაუმეტეს 18 თვეა განსაზღვრული. ამასთან, მიმწოდებელმა ხელშეკრულების გაფორმებიდან 10 თვის განმავლობაში უნდა უზრუნველყოს მეოთხე ავტობაზის სამშენებლო ინფრასტრუქტურის იმ დონემდე მიყვანა, რომ შესაძლებელი იყოს მინიმუმ პირველ ეტაპზე შემოყვანილი 50 ერთეული 18 მეტრიანი ავტობუსების ექსპლუატაცია. კერძოდ 10 თვეში უნდა მოეწყოს:

1. სადგომი ტერიტორია - პლაცი

2. გაზგასამართი სადგური

3. სამრეცხაო

4. სარეგლამენტო მომსახურეობის სივრცე

5. სადისპეტჩერო და სამექანიკო სივრცე

6. საკანალიზაციო და წყალმომარაგების სისტემა

7. ელექტრო ენერგიით და ბუნებრივი გაზით უზრუნველყოფა

8. ტერიტორიის შემოღობვა

9. საინფორმაციო და თანამედროვე ტექნოლოგიების სამუშაო ინფრასტრუქტურა

10. დაცვის სამსახურისთვის საჭირო მინიმალური ინფრასტრუქტურა.

სატენდერო პირობების თანახმად, პრეტედენტს, რომელსაც ამ სამუშაოს შესრულება სურს, 2017 წლის შემდგომ ავტობაზის მშენებლობის და დაპროექტების გამოცდილება უნდა გააჩნდეს.

1. M3 კატეგორიის მუნიციპალური ავტობუსების ავტობაზის ან ანალოგიური ინფრასტრუქტურული ობიექტის დაპროექტების გამოცდილება, კერძოდ, 2017 წლიდან (ელექტრონული ტენდერის (აუქციონის გარეშე) სტატუსის - „წინადადებების მიღება მთავრდება“ თარიღის ჩათვლით) უნდა ჰქონდეს შესრულებული არანაკლებ სამი საპროექტო- სახარჯთაღრიცხვო დოკუმენტაცია ზემოაღნიშნულ სფეროში, რომლის დამადასტურებელი დოკუმენტები - ხელშეკრულებ(ებ)ა და ამავე ხელშეკრულებ(ებ)ის მიღება-ჩაბარების აქტ(ებ)ი და დადასტურებული საგადასახადო ანგარიშ-ფაქტურები/საგადახდო დავალებები ან/და ინფორმაცია შესაბამისი სატენდერო განცხადების ნომრების მითითებით უნდა ატვირთოს ერთიან ელექტრონულ სისტემაში.

2. M3 კატეგორიის მუნიციპალური ავტობუსების ავტობაზის ან ანალოგიური ინფრასტრუქტურული ობიექტის მშენებლობის გამოცდილება, კერძოდ, 2017 წლიდან (ელექტრონული ტენდერის (აუქციონის გარეშე) სტატუსის - „წინადადებების მიღება მთავრდება“ თარიღის ჩათვლით) უნდა ჰქონდეს შესრულებული არანაკლებ სამი ობიექტი ზემოაღნიშნულ სფეროში, რომლის დამადასტურებელი დოკუმენტები - ხელშეკრულებ(ებ)ა და ამავე ხელშეკრულებ(ებ)ის მიღება- ჩაბარების აქტ(ებ)ი და დადასტურებული საგადასახადო ანგარიშ-ფაქტურები/საგადახდო დავალებები ან/და ინფორმაცია შესაბამისი სატენდერო განცხადების ნომრების მითითებით უნდა ატვირთოს ერთიან ელექტრონულ სისტემაში.