„თბილისში ბინის დაქირავება კატასტროფულად არის გაძვირებული, მაგალითად გარეუბნებად რაც ითვლებოდა — გლდანი, ვარკეთილი და სხვა, დღეს იგივე ფასი ადევს, რაც შარშან ვაკეზე და საბურთალოზე იყო“
ზაფხულის აქტულაური კითხვა — სად წავიდეთ დასასვენებლად? თუ, თბილისიდან შორს წასვლას ვერ ვახერხებთ, გამოსავალი აქვე ახლოს, დედაქალაქის შემოგარენია. მაგრამ ბევრი ფაქტორის გათვალისწინებით, ამ ზაფხულს ფასები განსაკუთრებით გაზრდილია, აგარაკის დაქირავება თვეში 15 000 დოლარსაც აღწევს. რაც ეხება დღიურ ქირას, ზოგ შემთხვევაში, ფასი 2000 ლარამდეც ადის.
უძრავი ქონების პორტალ „home.ge“-ში „კომერსანტს“ განუცხადეს რომ თბილისის შემოგარენში აგარაკებზე მაღალი აქტივობა ჯერჯერობით არ არის და მოთხოვნა ივლისში უფრო იქნება. რაც შეეხება ფასებს „home.ge“ -ში ამბობენ, რომ შარშანდელთან შედარებით 10-15% ით არის გაზრდილი და ერთი თვით სახლის დაქირავებაზე ფასი 2500 დოლარიდან იწყება.
თბილისის შემოგარენში აგარააკების დაქირავებაზე მოთხოვნის ზრდაზე საუბრობს kibe.ge- ს წარმომადგენელი ეკატერინე ბარათელი. რაც ეხება ღირებულებას, ისიც ამბობს, რომ ფასი შარშანდელთან შედარებით, დაახლოებით 500 – 1000 დოლარით არის გაზრდილი.
„თუ შარშან თბილისთან ახლოს კერძო სახლის ფასი, სეზონზე თვეში 4000-4500 დოლარი იყო, დღეს იგივე სახლებზე ფასი 500 ან 1000 დოლარით არის გაზრდილი. ძალიან კარგად ქირავდება წავკისი, ტაბახმელა, კოჯორი, კიკეთი, წოდორეთი, ბოლო პერიოდში ძალიან დაიტვირთა თხინვალაცც. ფასიდან გამომდინარე ძალიან დიდი მოთხოვნაა ბურიანზეც, აქ სახლის დაქირავება თვეში 600 დოლარადაც შეძლება. სხვაობა შარშანდელთან შედარებით მინიმალურია“, — ამბობს ეკატერინე ბარათელი.
kibe.ge- ს გაყიდვების მენეჯერი დედაქალაქში გაზრდილ ფასებზეც საუბრობს. „თბილისში ბინის დაქირავება კატასტროფულად არის გაძვირებული, მაგალითად გარეუბნებად რაც ითვლებოდა გლდანი, ვარკეთილი და სხვა დღეს იგივე ფასი ადევს, რაც შარშან ვაკეზე და საბურთალოზე იყო, რაც დაახლოებით 800-850 დოლარის ფარგლებში მერყეობს“, - აღნიშნა ბარათელმა.
თაკო კვაჭანტირაძე