თბილისს საზღვარი შეეცვალა. აღნიშნულის შესახებ შესაბამისი გადაწყვეტილება საკანონმდებლო მაცნეზე უკვე გამოქვეყნდა. შედეგად, დაახლოებით, 2 700 000 კვ. მეტრი ფართობის ტერიტორიაა თბილისის საზღვრებიდან გავა და გადაეცემა გარდაბნის მუნიციპალიტეტს. აღნიშნული ტერიტორია მდებარეობს კრწანისში და მას თელეთის საკრებულო ესაზღვრება.

ფართის გაცემის მიზეზი კი კონკრეტული საინვესტიციო პროექტია, რომელიც გარდაბნის მუნიციპალიტეტში სოფელ თელეთში ხორციელდება. ამ ტერიტორიაზე შპს „პრიმერა გოლფ ენდ რეზიდენცსი“ საცხოვრებელ კომპლექსს და სარეკრეაციო ტერიტორიას აშენებს. აღსანიშნავია, რომ აღნიშნული პროექტის ფარგლებში თელეთში უკვე ფუნქციონირებს 18 ფოსოიანი გოლფის მოედანი.

კომპანიამ თელეთში მდებარე ტერიტორია აღნიშნული პროექტისთვის 2013 წელს შეიძინა, თუმცა, მოგვიანებით გაირკვა, რომ მიწის ნაკვეთი თბილისის ადმინისტრაციულ საზღვრებში ხვდებოდა. შესაბამისად, კომპანია მოითხოვა საზღვრების დაკორექტირება იმგვარად, რომ ეს საპროექტე ტერიტორია სრულად გარდაბნის მუნიციპალიტეტის სოფელ თელეთის საზღვრებში მოხვედრილიყო.

ინვესტორის აღნიშნული მოთხოვნის საფუძველზე პარლამენტს შესაბამისი წინადადებით მთავრობამ მიმდინარე წლის შემოდგომაზე მიმართა. პარლამენტმა კი აღნიშნული მოთხოვნა საზღვრის შეცვლის თაობაზე დააკმაყოფილა.

რაც შეეხება ინვესტორს - შპს „პრიმერა გოლფ ენდ რეზიდენცსს“, რეესტრის თანახმად, კომპანიის 90%-იან წილს -ესტონური შპს OU Skinest Air, 10%-ს კი შპს „პედრო ლუის პასტორ“-ი ფლობს.

წყარო: "ბიზნესპრესნიუსი"