მიმდინარე პერიოდში როგორც ახალ აშენებულ კორპუსებში, ასევე ძველ კორპუსებში ბინაზე მოთხოვნაც და ფასიც გაზრდილია - ამის შესახებ „კომერსანტს“ RE/MAX Capital-ის თანადამფუძნებელმა მარიამ ასათიანმა უთხრა. მისი თქმით, როდესაც ბინის დაქირავებაზე მოთხოვნა იზრდება, იზრდება ბინების გაყიდვაც, რადგან ადამიანები ბინის შეძენაში ინვესტირების შესაძლებლობას ხედავენ.
„მოთხოვნის გაზრდასთან ერთად გაიზარდა ფასებიც, მეორე მიზეზი რამაც ფასების გაზრდა გამოიწვია ეს არის თვითღირებულების გაზრდაც, რომელიც დაახლოებით 40% - ით გაძვირდა.
მესამე მიზეზი არის ის, რომ კოვიდის დროს თითქოს ცოტა უფრო შეჩერებული იყო გაყიდვები, თუმცა ვერც ვადასტურებ რომ კოვიდის დროს ძალიან შენელდა ბაზარი, მაგრამ თუ მოთხოვნა შენელებული იყო, ახლა ერთბაშად აღდგა, ოღონდ არა ვიზიტორებიდან გამომდინარე, რამედ იქიდან გამომდინარე, რომ შეჩერების მერე ბაზარი უფრო რეალიზდა.
ფასზე ასევე იმოქმედა იმანაც, რომ კოეფიციენტების გაცემა და ზოგადად მიწის ფასიც გაზრდილია. კოეფიციენტების გაცემაზე მაღალ სართულიანი კორპუსების მშენებლობა უფრო შეზღუდულია, შესაბამისად ამ მშენებლობებში ფასის გაზრდა ამანაც გამოიწვია , რამდენიმე მიზეზის ერთობლიობამ და პირველ რიგში მაინც მოთხოვნის გაზრდამ გამოიწვია ფასების ზრდა“, - აღნიშნა მარიამ ასათიანმა.
ასათიანის თქმით, ფასები ახალაშენებულ ბინებზე უფრო მეტად ძველ კორპუსებში უფრო ნაკლებად, თუმცა ჯამში მაინც გაიზარდა. მისი თქმით, ფასები განსაკუთრებით ცენტრალურ უბნებში არის გაზრდილი, მაგალითად თუ ვაკეში 1 კვადრატული მეტრის ფასი 1500 დოლარი იყო, დღეს მისი ფასი 2200 დან 2500 დოლარამდე მერყეობს.
„რაც შეეხება ფასს, პროცენტის რენჯი შემიძლია გითხრათ, მაგალითად ვაკეში, ჩვენ ძირითადად ქალაქის ცენტრში პრემიარული კლასის ბინებს ვყიდით, მაგრამ თუ უბან -უბან შევადარებთ , მაგალითად თუ ვაკეში ახალაშენებული ბინის ფასები კვადრატულ მეტრზე 1500 დოლარიდან იწყებოდა, ახლა მისი ფასი მინიმუმ 2200- დოლარიდან 2500 დოლარამდეც მერყეობს და ზოგ შემთხვევაში მეტიც არის. დაახლოებით 30-40% - იანი ზრდაც გვაქვს ზოგ შემთხვევაში. საშუალოდ ფასები გაზრდილია სადღაც 15-40% - მდე გააჩნია ლოკაციას. ახალი ბინები უფრო გაძვირდა ვიდრე ძველი ბინები“. - აღნიშნა მარიამ ასათიანმა.
რაც შეეხება უცხოელი ვიზიტორების მიერ ბინების შეძენას, მარიამ ასათიან ამბობს, რომ კომპანია რემაქს კაპიტალის სეგმენტის 40% ძირითადად უცხოელები არიან, თუმცა მასში რუსეთის მოქალაქეები არ შედიან.
„ჩვენი სეგმენტის 40% უცხოელი მყიდველები არიან, გვყავს ევროპელები ასევე დაინტერესებაა ისრაელიდან, ჩვენი კომპანია საერთაშორისო კომპანიაა და ხშირად სხვადასხვა ქვეყანაში ოფისებსაც კონტაქტებით და ისინიც გვგზავნიან მყიდველებს ჩვენი სეგმენტი ძირითადად აზერბაიჯანი, უკრაინა, ისრაელი, სომხეთი და ევროპაა, კანადიდანაც გვქონდა მოთხოვნა. რაც შეეხება რუსეთს, რუსეთთან არ გვაქვს შეხება, არც ოფისი გვაქვს რუსეთში და არც პარტნიორები“ - აღნიშნა მარიამ ასათიანმა.
თაკო კვაჭანტირაძე