თბილისში BUS LANE-ზე ავტომობილების მოძრაობისთვის ან დგომისთვის 2022 წელს ბიუჯეტში ჯარიმის სახით 226%-ით მეტი თანხა შევიდა ვიდრე 2021 წელს.

როგორც სახელმწიფო ხაზინის მონაცემებიდან ირკვევა, 2022 წელს ბიუჯეტმა, დედაქალაქის ადმინისტრაციულ საზღვრებში სამარშრუტო სატრანსპორტო საშუალებების მოძრაობისთვის განკუთვნილ სპეციალურ ზოლში (BUS LANE) სამარშრუტო სატრანსპორტო საშუალებების გარდა სხვა სახის სატრანსპორტო საშუალებების მოძრაობის, გაჩერების ან დგომისათვის სანქციებიდან (ჯარიმები და საურავები) 4,462,325.69 ლარის შემოსავალი მიიღო. აღნიშნული თანხიდან კი 2,677,395.54 ლარი დედაქალაქის ბიუჯეტში შევიდა, ხოლო 1,784,930.15 ლარის სახელმწიფო ბიუჯეტში.

რაც შეეხება 2021 წლის ანალოგიურ მაჩვენებლებს BUS LANE-ზე გავლისთვის ან დგომისთვის ჯარიმის საერთო მოცულობამ 1,368,738.30 ლარი შეადგინა, საიდანაც თბილისის ბიუჯეტში 821,242.98 ლარის, ხოლო სახელმწიფო ბიუჯეტში 547,495.32 ლარის აკუმულირება მოხდა.

აღსანიშნავია, რომ სამარშრუტო სატრანსპორტო საშუალების მოძრაობისათვის განკუთვნილ სპეციალურ ზოლში („BUS LANE“) სამარშრუტო სატრანსპორტო საშუალების გარდა სხვა სახის სატრანსპორტო საშუალების მოძრაობა, გაჩერება ან დგომა ითვალისწინებს ჯარიმას 100 ლარის ოდენობით.