მოქალაქეები რესპუბლიკის მოედანზე, საწვავის გაძვირებასთან დაკავშირებით აქციას მართავენ.აქციის ორი მთავარი მოთხოვნა საწვავზე აქციზის გადასახადის გაუქმება და დღგ-ს გადასახადის მცურავ რეჟიმზე გადაყვანაა, რაც აქციის მონაწილეების განცხადებით, 80-90 თეთრით გააიაფებს საწვავის ფასს.
აქციის ორგანიზატორები მოითხოვენ, რომ შესაბამისი კომპეტენტური პირები 16:00 საათამდე შეხვდნენ და მათ მოთხოვნაზე პასუხი გასცენ, წინააღმდეგ შემთხვევაში კი მსვლელობას აანონსებენ.
,,საწვავის ფასი ისტორიულ ზღვარს გადაცდა და თითოეული მოქალაქისთვის არის ძალიან მნიშვნელოვანი. საწვავის ფასი არ ეხება მხოლოდ საწვავს, ამით ყველანაირი პროდუქტი და მედიკამენტი ძვირდება. ჩვენი მოთხოვნაა გაუქმდეს საწვავის აქციზის გადასახადი და დღგ-ს გადასახადი გადავიდეს მცურავ რეჟიმზე, რაც მინიმუმ 80-90 თეთრით გააიაფებს საწვავის ფასს. დაველოდებით კომპეტენტურ პირს, რომელიც შეიძლება შეგვხვდეს და გაგვცეს პასუხები, თუ არავინ არ იღო ყურად ჩვენი მოთხოვნები, ამ შემთხვევაში მივმართავთ რადიკალურ ზომებს - კონკრეტულად იქნება მსვლელობა და უფრო ხმამაღლა გავაგონებთ ჩვენს ხმას, 16:00 საათამდე დაველოდებით გამოხმაურებას”, - აღნიშნა აქციის ერთ-ერთმა მონაწილე გიორგი გილიგაშვილმა.
ამ წუთებში რესპუბლიკის მოედანზე, საწვავის გაძვირებასთან დაკავშირებით მიმდინარე აქციის მონაწილეები მსვლელობით პარლამენტის შენობისკენ მიემართებიან. აქციის მონაწილეები სკანდირებენ ,,პროტესტი საწვავის ფასს”, ,,არა გაძვირებულ ცხოვრებას” , ,,გამოდით, გამოდით”.
რუსთაველის გაზირზე გადაკეტილია მოძრაობა.
აქციის მონაწილეები ავტომობილების მძღოლებს მოუწოდებენ, რომ საკუთარი ავტომობილები გზაზე გააჩერონ, რის შედეგადაც რუსთაველის მოედანზე საავტომობილო მოძრაობა დროებით გადაკეტილია. აქციის მონაწილეებს ასევე შეუერთდნენ სხვადასხვა კომპანიის კურიერები.
წყარო: ინტერპრესნიუსი