19 დეკემბერს ორთაჭალაში ქსელური მარკეტი  „გურმანია“ გაიხსნა,  - ამის  შესახებ რადიო „კომერსანტის“ გადაცემაში „პროფესიონალები„ გურმანიას გენერალურმა დირექტორმა გიორგი რცხილაძემ ისაუბრა.  მისი თქმით „გურმანია“ ქმნის განსხვავებულ ასორტიმენტს, რომელიც ძირითადად  ორიენტირებულია კვების პროდუქტებზე, მათ შორის ადგილობრივ ხილ-ბოსტნეულზე.

„მთლიანად ასორტიმენტი ფორმირებულია ისე, რომ მაქსიმალურად წარგვედგინა ის პროდუქტები, რომელთაც უჭირთ  დახლზე მოხვედრა, მათ შორის ქართული ბრენდები, რომლებიც არ არიან მასშტაბურები და არ აქვთ დიდი თანხები იმისთვის, რომ ქსელებში შესვლა და  დახლებზე ადგილის  მოპოვება მოახერხონ

ქსელებში ასეთი პრაქტიკაა, წინასწარ ითხოვენ გარკვეულ ინვესტიციებს, არის დახლებზე გარკვეული გადასახადები, გადასახადია პროდუქციის რეგისტრაციაზე, ქსელში შესვლაზე და ა.შ. საბოლოო ჯამში მცირე მწარმოებლისთვის, ეს  საკმაოდ სოლიდურ თანხაზე ადის და ამხელა  ფინანსური  რესურსის გაღება ქართული დამწყები  ან  თუნდაც  არსებული კომპანიისთვის საკმაოდ რთულია, რადგან კონკურენციაში  შედიან მსხვილ  მწარმოებლებთან, რომელთაც მარკეტინგული ხარჯებისთვის  დიდი ბიუჯეტი  აქვთ და უპირატესობაში არიან“, - აღნიშნა გიორგი რცხილაძემ.

როგორც  რცხილაძემ აღნიშნა,  თავიდან  ქართველი მწარმოებლებისგან  პასიურობა  შეინიშნებოდა,   რადგან გამომიდინარე იქიდან, რომ „გურმანია“  ქსელური მარკეტია, მოლოდინი იყო, რომ ქსელში  შესასვლელად  გარკვეული ინვესტიცია  იქნებოდა  საჭირო, თუმცა მას  შემდეგ  როდესაც  ბიზნეს  მიდგომებს  გაეცნენ  „გურმანიამ  საკმაოდ  საინტერესო  პარტნიორები გაიჩინა.

„ჩვენთან  წარმოდგენილია  Native Racha და  სხვადასხვა ბრენდები, ვთანამშრომლობთ თაფლის მწარმოებლებთან, ასევე გვყავს  შედარებით მსხვილი მწარმოებლებიც, ოფიციალურ  გახსნასთან ერთად  იზრდება დაინტერესება  მცირე  მწარმოებლებისგა,  ეს  პორტფელი კიდევ გაიზრდება და მომხმარებლისთვის  უფრო  საინტერესო  გახდება“, -  აღნიშნა გიორგი რცხილაძემ.

რაც  შეეხება  ინვესტიციებს,  გიორგი  რცხილაძის თქმით, „გურმანიას“  ძლიერი მხარე  არის ის, რომ  ქსელის  განვითარება  მთლიანად  ინვესტიციით  ფინანსდება  და  არა  მომწოდებლების  ხარჯზე. როგორც გიორგი რცხილაძე ამბობს, ინვესტიცია ქართულ-ამერიკულია,  ქსელის  განვითარებას  ქართული  ბიზნეს -ჯგუფი აფინანსებს,  ამერიკული დაფინანსება კი გაზელის  ფონდისგან მოდის.

„პირველი  ფილიალის  გახსნაზე ამ ეტაპზე ინვესტირებულია დაახლოებით მილიონი  ლარი, დაგეგმილი გვაქვს, რომ  შემდეგ  წელს  2 მილიონი დოლარის  ინვესტიციას  გავაკეთებთ და დაახლოებით მარტიდან ქსელის გაფართოებას  დავიწყებთ. მომდევნო წლიდან  პირველ  ეტაპზე თბილისში  გვინდა დაახლოებით 10 ფილიალის  გახსნა , ვაპირებთ  დიდი  და  მცირე  ფილიალების  გახსნას და  გეოგრაფიის  გაზრდას.

დღესდღეობით ხარისხიან  პროდუქტებზე ხელმისაწვდომობა  შეზღუდულია და მათი პოვნა უფრო ჰიპერმარკეტებშია შესაძლებელი. ჩვენ  გვინდა, რომ  მომხმარებელთან უფრო  ახლოს  ვიყოთ. სამომავლო პერსპექტივაშია რეგიონულ  გაფართოება.

მნიშვნელოვანია ის, რომ ჩვენ  აქცენტი  გვაქვს  ხილ-ბოსტნეულზე, რომლის  ხარისხის  კონტროლიც   ქვეყანაში, ზოგადად, პრობლემაა.  ჩვენ ამ  მხრივაც  განსხვავებულ  მიდგომას  შევთავაზებთ  მომხმარებელს,  ჩვენი  დედა -კომპანიაა  ხილ-ბოსტნის  ლოგისტიკური  ცენტრი და  ფაქტობრივად  შუა  რგოლი  იქნება  დედა კომპანია, რომელიც  ევროპული  დონის  ინფრასტრუქტურით  უზრუნველყოფს პროდუქტის ფერმერიდან დახლამდე მიწოდებას“, - აღნიშნა გიორგი რცხილაძემ.