თბილისში „რამადა ენკორის“ ბრენდის ორი სასტუმრო მფლობელი თურქული კომპანია გახდა. ყაზბეგის 15 ნომერში მდებარე სასტუმრო „რამადა ენკორი“ შპს „ყაზბეგი15-მა“ შეიძინა, მელიქიშვილის 10 ნომერში მდებარე სასტუმრო „რამადა თბილისი“ კი შპს მელიქიშვილი 10-მა. ორივე ამ შპს-ს 100%-ის მფლობელი სააქციო საზოგადოება გრინლაით დიშ თიჯარეთია, რომელიც თურქეთშია რეგისტრირებული. აღნიშნული ორივე შპს-ს დირექტორი აზერბაიჯანის მოქალაქე ფარვიზ აბასგულიევია.
სასტუმროების გაყიდვის შესახებ ინფორმაცია „საქართველოს კაპიტალმა“ მარტის ბოლოს გაავრცელა, სადაც აღნიშნული იყო, რომ თბილისში რამადა ენკორის ბრენდის ორი სასტუმრო და ერთი ვაკანტური მიწის ნაკვეთი $28 მილიონ დოლარად გაყიდა.
„საქართველოს კაპიტალი აცხადებს სტუმარმასპინძლობის სფეროში მისი აქტივების ნაწილის რეალიზების შესახებ. ორი ოპერირებაში მყოფი სასტუმრო თბილისში, რომლებიც ამჟამად “რამადა ენკორის” ბრენდის ქვეშ იმართებიან და ერთი მიწის ნაკვეთი. ამ გარიგებებიდან მისაღები მთლიანი შემოსავალი 28 მილიონ დოლარს შეადგენს,“- ნათქვამი იყო განცხადებაში.
ყაზბეგის გამზირზე მდებარე სასტუმრო „რამადა ენკორი, 152 ნომერს აერთიანებს, ობიექტი 2018 წელს გაიხსნა. ხოლო მეორე სასტუმრო „რამადა თბილისი“ მელიქიშვილის ქუჩაზე მდებარეობს და 125 ნომერს აერთიანებს. სასტუმრო 2022 წელს გაიხსნა.