თბილისში შენობების 70% ავარიულია და ეს ძირითადად შეეხება 1992 წლამდე ნაშენ შენობებს - ამის შესახებ არქიტექტორი ირაკლი როსტომაშვილი აცხადებს.

მისი თქმით, 1992 წლის შემდეგ ნაშენები მშენებლობები საკმაოდ მყარი კონსტრუქციებია, რომლებიც 8 ბალის სიმძლავრის მიწისძვრას უნდა უძლებდეს. როგორც ირაკლი როსტომაშვილი აღნიშნავს, პრობლემას წარმოადგენს ის, რომ საცხოვრებელი სახლების უმრავლესობის ექსპლუატაციის ვადა დიდი ხანია გასულია და ყველაზე დიდ საფრთხეს უნებართვო მიშენებები და დაშენებები ქმნის.

„თურქეთში მიწისძვრას კატასტროფული ნგრევა მოჰყვა. ვრცელდებოდა ინფორმაცია, რომ საცხოვრებელი სახლები, რომლებიც თბილისში შენდება, საშიშია, ეს არის მცდარი ინფორმაცია. 1992 წლის შემდეგ, როდესაც თბილისში შეიცვალა სეისმომედეგობის მაჩვენებელი 8 ბალზე, მას შემდეგ დაპროექტებული შენობები ამ სტანდარტებს შეესაბამება. აქ ერთმანეთში ხშირად ურევენ ე.წ. ბეტონის ჯუნგლებს, იერსახეს, გარემოს ან უსისტემო განაშენიანებას, მაგრამ ამას არანაირი შეხება არ აქვს შენობის კონსტრუქციულ მდგრადობასთან. 

რაც შეეხება პრობლემებს, თბილისში ძალიან სერიოზული პრობლემები გვაქვს ავარიულ შენობებთან დაკავშირებით. შეიძლება ითქვას, რომ თბილისში შენობების 70% ავარიულია და ეს ძირითადად შეეხება 1992 წლამდე ნაშენ შენობებს, დავიწყოთ ისტორიული შენობებით 1800-იან 1900-იანი წლების დასაწყისში ნაშენებით, რომელიც ნაანგარიშები იყო 6 და 7 ბალზე. რაც მთავარია ამ შენობებს არასწორად უტარდებოდა ექსპლუატაცია, იყო გაუაზრებელი მიშენებები, დაშენებები, გადაკეთებები, კონსტრუქციული კედლის გამონგრევები და ა.შ. ეს არის სერიოზული პრობლემა და საშიშია“, — ამბობს ირაკლი როსტომაშვილი.

როგორც არქიტექტორი ამბობს, დღეს, 2009 წელს დაკორექტირებული რუკაზე დაყრდნობით ხდება ყველა შენობის და საინჟინრო ნაგებობის დაპროექტება და როგორც სპეციალისტები ამბობენ რუკა არ შეესაბამება რეალურ სურათს.