მიმდინარე წლის მარტში, თბილისში, გასული წლის ანალოგიურ პერიოდთან შედარებით, უძრავი ქონების ტრანზაქციები შემცირდა. როგორც რადიო „კომერსანტის“ ეთერში Colliers-ის კვლევისა და მონაცემთა სერვისების ხელმძღვანელმა ლეო ჩიქავამ განაცხადა, ბათუმში კლება არ ყოფილა, 16%-იანი ზრდა იყო, თუმცა ტენდენცია მაინც კლებისკენაა წასული.
„მარტში თბილისში უძრავი ქონების ტრანზაქციების 12%-ით შემცირდა, ხოლო ბათუმში არ გვქონია შემცირება, მაგრამ თუ პირველ 2 თვეში ზრდა იყო 75 და 42%, მარტში - 16%-მდე შემცირდა მაჩვენებელი“, - აცხადებს ლეო ჩიქავა.
მისი თქმით, თბილისში ტრანზაქციების წილი ახალი პროექტებზე (რომელთა მშენებლობა დასრულდა 2012 წელს ან შემდეგ) 65%-ია, ბათუმში - დაახლოებით 80%. თბილისში ახალ აშენებულ სახლებში 14%-ით შემცირდა ტრანზაქციების რაოდენობა, ხოლო ბათუმში - 17%-ით გაიზარდა.
ლეო ჩიქავამ „კომერსანტის„ ეთერში უძრავი ქონების ტრანზაქციების კლების მიზეზებზეც ისაუბრა. მისი თქმით, ამის მიზეზი უცხო ქვეყნის მოქალაქეების საქართველოდან გასვლა და 2023 წლის მარტში თბილისში არასტაბილური პოლიტიკური გარემო იყო.
„თბილისში ტრანზაქციების შემცირების და ბათუმში ზრდის ტემპის მიზეზი უცხო ქვეყნის მოქალაქეების საქართველოდან გასვლაა. 2023 წლის პირველი კვარტლის მონაცემებით, 50 000 მოქალაქით მეტი გავიდა, ვიდრე შემოვიდა. მაშინ როცა, 2022 წელს შემოსვლები ჭარბობდა, მათ შორის პირველ კვარტალში 22 000-ით მეტი შემოვიდა, ვიდრე გავიდა. ტრანზაქციების კლების მეორე მიზეზი - მარტის დასაწყისში თბილისში არასტაბილური პოლიტიკური გარემო იყო, რის გამოც მოქალაქეებს შეიძლება თავი შეეკავებინათ მნიშვნელოვანი ფინანსური გადაწყვეტილებებისგან,“ - განაცხადა ლეო ჩიქავა.
რაც შეეხება უძრავი ქონების ფასებს, მისი თქმით, წინა წლის ანალოგიურ პერიოდთან შედარებით, თბილისში ფასები 11%-ით გაიზარდა, ბათუმში - 23%-ით.
„მეტი მოთხოვნაა ეკონომ-ფასის ბინებზე და მათი წილი მთლიან ტრანზაქციებში 2022 წელს თბილისში 70% იყო, ბათუმში - 60%. 2023 წელს 10 პროცენტული პუნქტითაა შემცირებული ეკონომ-კლასის ბინებზე მოთხოვნა.
ბოლო 1 თვეში ფასები დასტაბილურდა და ველოდებით, რომ 2023 წლის განმავლობაში ეს ტენდენცია შენარჩუნდება და არც მნიშვნელოვანი ზრდა და არც კლება არაა სავარაუდო, თუ რაიმე გლობალური ცვლილება არ მოხდა“, - განაცხადა ლეო ჩიქავამ.
უძრავი ქონება
