,,თეგეტა მოტორსის’’ საოპერაციო მოგებამ 73.836 მილიონი ლარი შეადგინა, რაც 17.2%-ით მეტია 2020 წელთან შედარებით, როდესაც საოპერაციო მოგება 63.029 მილიონი ლარი იყო.

„თეგეტა ჯგუფის“ ბრუნვა მოიცავს კლიენტებზე განხორციელებულ გაყიდვებს „ჯგუფში“ შემავალი მშობელი კომპანიისა და შვილობილების მიერ. 2021 წელს „თეგეტა ჯგუფის“ გაყიდვებმა 797.152 მილიონი ლარი შეადგინა , რაც 20,9%-ით აღემატებოდა წინა წლის შედეგს, როდესაც გაყიდვებმა 659.446 მილიონი ლარი შეადგინა.

წინა წელთან შედარებით მნიშვნელოვნად არის შემცირებული კომპანიის რეალიზაციისა და დისტრიბუციის ხარჯები, კერძოდ, 2021 წელს ეს ხარჯები შეადგენდა 3.990 მილიონ ლარს, რაც 67,6%-ით ნაკლებია 2020 წელთან შედარებით, როცა რეალიზაციისა და დისტრიბუციის ხარჯები 12.315 მილიონი ლარი იყო. ეს განპირობებულია ტრანსფორმაციის ეფექტით - რეალიზაციასთან ერთად კომერციული ხარჯებიც, შესაბამისად, შვილობილ კომპანიებზე გადავიდა. ამავე მიზეზით არის გაზრდილი კომპანიის სხვა საოპერაციო შემოსავლები (2021 წელი: 43.961 მილიონი ლარი, 2020 წელი: 11,046 მილიონი ლარი). იქიდან გამომდინარე, რომ 2021 წლის 1 აპრილიდან კომპანია მხოლოდ კორპორატიული ცენტრის ფუნქციას ასრულებს, მისი ძირითადი შემოსავლის წყარო გახდა საკონსულტაციო მომსახურებებიდან და იჯარიდან მიღებული შემოსავლები შვილობილი კომპანიებისგან.

„თეგეტა ჯგუფში“ ზოგადი და ადმინისტრაციული ხარჯები 2021 წელს 40.9%-ით გაიზარდა  და 71.754 მილიონი ლარი შეადგინა. 2020 წელს კი „ჯგუფის“ ზოგადი და ადმინისტრაციული ხარჯები 50.928 ლარი იყო. ხარჯების ზრდის მთავარი გამომწვევი ფაქტორი იყო 2021 წელს კომპანიის მასშტაბის ზრდა, რამაც გამოიწვია სხვადასხვა ხარჯების გაზრდა და ასევე, თანამშრომელთა რაოდენობის ზრდაც და შესაბამისად პერსონალის ხარჯის ზრდა.

შპს „თეგეტა მოტორსის“ დარეგისტრირდა 2001 წელს. კომპანიის 98.78% ეკუთვნის შპს ,,თი ჯი ემ ჯგუფს’’, ხოლო 1.22% თემურ კოხოძეს. კომპანია 26 შვილობილ კომპანიას აერთიანებს და ბაზრის ლიდერია ავტოინდუსტრიაში არამარტო საქართველოში, არამედ მთელ სამხრეთ კავკასიაში. კომპანიის მომსახურებით სარგებლობა შესაძლებელია საქართველოს ყველა რეგიონში და აზერბაიჯანში.