თელავის აეროპორტი „მიმინო“, რომელიც საქართველოს საავიაციო უნივერსიტეტის საკუთრებაშია, რეგულარული რეისების მიღებას ოქტომბრიდან პროგნოზირებს. როგორც საქართველოს საავიაციო უნივერსიტეტის წარმომადგენელმა დავით ტეფნაძემ „კომერსანტს“ განუცხადა, უახლოეს ხანებში საქართველოს აეროპორტების გაერთიანება შიდა ფრენებზე ტენდერს გამოაცხადებს, რომელშიც უკვე გათვალისწინებული იქნება თელავის აეროპორტში რეისების შესრულების საკითხიც.
დავით ტეფნაძის განმარტებით, განიხილება თელავი-ბათუმისა და თელავი-მესტიის მიმართულებაზე რეისებს დაწყება, თუმცა კონკრეტულად რომელი ავიაკომპანია შეასრულებს ფრენებს, ეს ტენდერის შემდეგ გახდება ცნობილი.
თავად საქართველოს აეროპორტების გაერთიანებას ტენდერი შიდა ფრენების შესყიდვაზე ჯერჯერობით არ გამოუცხადებია და შესაბამისად, თელავიდან რეისების შესრულების საკითხიც ამ ეტაპისთვის გაურკვეველი რჩება.
საქართველოს მთავრობა შიდა ფრენების სტიმულირებისთვის, დაფინანსების პროგრამას რამდენიმე წელია ახორციელებს, რაც თავის მხრივ მგზავრთნაკადზეც აისახება.
ქვეყნის მასშტაბით მგზავრთა საჰაერო გადაყვანისთვის ბიუჯეტიდან თანხებს ავიაკომპანია AK-Air Georgia იღებს, რომელიც ბოლო წლებში საქართველოს აეროპორტების გაერთიანების მიერ შიდა ფრენების სუბსიდირებაზე გამოცხადებულ ტენდერებში იმარჯვებს.
რაც შეეხება თელავის აეროპორტ “მიმინოს ის საქართველოს საავიაციო უნივერსიტეტის მფლობელობაშია, სადაც სასწავლო პროგრამებით გათვალისწინებული პრაქტიკები ხორციელდება.
აეროპორტი აღჭურვილია თანამედროვე სასწავლო მატერიალურ-ტექნიკური ბაზით და საჰაერო ხომალდებით:
Cessna 152
Aeroprakt A-22
Tecnam P2006T
აეროპორტის ტერიტორიაზე აშენდა თვითმფრინავების ტექნიკური მომსახურების საწარმო, სანავიგაციო კოშკურა, აეროვაგზლის შენობა მგზავრებისათვის და საერთო საცხოვრებელი პილოტ-ინსტრუქტორებისა და საინჟინრო-ტექნიკური პერსონალისთვის. ამჟამად აქ საფრენოსნო და საინჟინრო ფაკულტეტის სტუდენტები პრაქტიკულ მომზადებას გადიან.
თელავის აეროპორტი შეესაბამება საქართველოს კანონმდებლობის მოთხოვნებს, რასაც ადასტურებს საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს მიერ გაცემული აეროდრომის ვარგისობის სერტიფიკატი.
აეროპორტიდან შესაძლებელია საქართველოს მასშტაბით საჰაერო გასეირნების (საჰაერო ტურების) ორგანიზება ტურისტებისთვის.