რუსეთ-უკრაინის ომმა ქართველი ექსპორტიორების გეგმები რადიკალურად შეცვალა. ღვინის მწარმოებლები ამბობენ, რომ ორივე მიმართულებით ექსპორტს აჩერებენ, სანამ ბიზნესისთვის მცირე რისკი მაინც არსებობს. კომპანია ,,თელავის ღვინის მარნის“  დირექტორი ზურაბ რამაზაშვილი ,,კომერსანტთან“ ამბობს, რომ შექმნილი მძიმე მდგომარეობიდან გამომდინარე, ზომები წინასწარ მიიღეს და ომის დაწყებამდეც შეაჩერეს ექსპორტი რუსეთისა და უკრაინის მიმართულებით.

,,გარკვეული გეგმები არის, შეკვეთებიც გვაქვს, მაგრამ მაღალი რისკიდან გამომდინარე, ჯერჯერობით ექსპორტს ორივე მიმართულებით შევაჩერებთ. ვფიქრობთ, რომ ალტერნატივაზე ფიქრი ჯერ ძალიან ადრეა. ეს არ არის მარტივი პროცესი და არც მცირე დროში მოხერხდება. შეიძლება წლებიც დასჭირდეს. კონფლიქტი თუ დროში გაიწელება, ცხადია, დანაკარგი იქნება, თუმცა როგორ განვითარდება მოვლენები, რთულია პროგნოზირება. მსოფლიოში ვერავინ იტყვის, რა იქნება ხვალ, მაგრამ ოპტიმიზმის შენარჩუნებას ვცდილობთ. იმის გათვალისწინებით, რომ ჩვენთვის რუსეთს არ უჭირავს პირველი ადგილი და არც უკრაინის ბაზარია გადამწყვეტი კომპანიის სიცოცხლისუნარიანობისთვის, ჯერჯერობით თავის გატანას შევძლებთ“, - ამბობს ზურაბ რამაზაშვილი.

ექსპორტიორის ინფორმაციით,  რუსეთისა და უკრაინის წილი ჯამურად მთელი წარმოების დაახლოებით 25%-ს შეადგენდა.

ცნობისთვის, ღვინის ეროვნული სააგენტოს მონაცემებით, ჯამში  2021 წელს საქართველოდან მსოფლიოს 62 ქვეყანაში 107 მილიონი ბოთლი ღვინოა ექსპორტირებული, რაც დამოუკიდებელი საქართველოს ისტორიაში ყველაზე მაღალი მაჩვენებელია.

ამ პერიოდში საქართველოდან სხვადასხვა მოცულობის ღვინის ექსპორტი 421-მა კომპანიამ განახორციელა.

მარი ჩიტაია