ტელეკომპანია „დოჟდმა“ ევროპული მაუწყებლობის ლიცენზია მიიღო.  ლიცენზია ნიდერლანდების მედიის მარეგულირებელმა ხუთი წლის ვადით გასცა. ამის შესახებ „დოჟდის“ მთავარი რედაქტორი, ტიხონ ძიადკო სოციალურ ქსელში წერს.

„ეს ნიშნავს იმას, რომ „დოჟდს“  შეეძლება დაუბრუნდეს საკაბელო ქსელს, რომლიდანაც ტელეკომპანია  6 დეკემბერს ლატვიის ეროვნული ელექტრონული მედიის საბჭოს მიერ ლიცენზიის გაუქმების შემდეგ იქნა გათიშული.

გარდა ამისა, ნიდერლანდური მაუწყებლობის ლიცენზიის მოპოვებასთან დაკავშირებით, „დოჟდი“ გადაიტანს სარედაქციო ცენტრს ამსტერდამში, ხოლო არხის ამსტერდამის სტუდია გახდება მთავარი, როგორც კი თანამშრომლები მიიღებენ ნებართვას ნიდერლანდებში მუშაობისთვის,“ - აცხადებს ძიადკო.

„დოჟდის“  მთავარი რედაქტორის თქმით, 9 იანვარს „დოჟდმა“ სასამართლოში გაასაჩივრა ლატვიის მედიის მარეგულირებლის გადაწყვეტილება ლიცენზიის გაუქმების შესახებ.

ძიადკოს განცხადებით, მათ გეგმებშია ლატვიაში ოფისისა და პერსონალის ნაწილის შენარჩუნება.

„ჩვენ ვგეგმავთ ოფისისა და პერსონალის ნაწილის შენარჩუნებას რიგაში, ვინაიდან რედაქციის საინფორმაციო სტრატეგიის თვალსაზრისით ჩვენთვის უმნიშვნელოვანეს მიმართულებად რჩება ლატვია,“ - წერს „დოჟდის“ მთავარი რედაქტორი.

ტელეკომპანია "დოჟდს", რომელმაც რუსეთში დაბლოკვის შემდეგ ლატვიიდან მაუწყებლობდა, 6 დეკემბერს ლატვიის კომუნიკაციების მარეგულირებელმა ლიცენზია გაუუქმა. მანამდე დეკემბრის დასაწყისში ტელეკომპანია დაჯარიმდა  ეთერში რუკის ჩვენების გამო, რომელზეც ყირიმი რუსეთის ნაწილად იყო წარმოჩენილი და რუსეთის ჯარის მიმართ ფრაზა “ჩვენი არმიის” გამოყენებისთვის. ასევე დეკემბრის თვეშივე „დოჟდის“ წამყვანმა  ალექსეი კოროსტელევმა ეთერში ისაუბრა რუსი სამხედროების დახმარებაზე.

იმავე დღეს ლატვიის სახელმწიფო უსაფრთხოების სამსახურმა “დოჟდის” გადაცემაში გაჟღერებულ ინფორმაციასთან დაკავშირებით გამოძიება დაიწყო. წამყვანი ტელევიზიიდან გაათავისუფლეს.

გათავისუფლებულმა ტელეწამყვანმა, ალექსეი კოროსტელევმა "ტელეგრამის" არხზე დაწერა, რომ მისი სიტყვები კონტექსტიდან იყო ამოღებული და რუსი ჯარისკაცებისთვის დასახმარებლად არაფერი გაუგზავნია.

6 დეკემბერს ლატვიის მაუწყებელთა მარეგულირებელმა “დოჟდის” მაუწყებლობის ლიცენზია გააუქმა და ეს გადაწყვეტილება “ეროვნული უსაფრთხოებასა და საზოგადოებრივი წესრიგისთვის საფრთხეს” დაუკავშირა.