ეროვნული ბანკის პრეზიდენტს კობა გვენეტაძეს რამდენიმე დღეში უფლებამოსილების შვიდწლიანი ვადა ეწურება. ამის პარალელურად, „საქართველოს ეროვნული ბანკის კანონში“ დაჩქარებული წესით ცვლილები შევიდა, რომელიც სებ-ში პირველი ვიცე-პრეზიდენტის პოსტს ამკვიდრებს. მთავრობის ასეთი ნაბიჯები კრიტიკულად შეაფასა IMF-მა, ორგანიზაციაში თვლიან, რომ ეს სიახლე ცვლის „სებ-ის მართვის სტრუქტურას და თავდაუზოგავი შრომით მოპოვებული სანდოობის დაკარგვის რისკს ქმნის“.

საქართველოს პრეზიდენტის ყოფილმა მრჩეველმა, ფინანსისტმა თემურ ბასილიამ „კომერსანტთან“ კობა გვენეტაძის შვიდწლიანი მოღვაწეობა შეაფასა, სებ-ის მომავალი ხელმძღვანელისთვის აუცილებელ კრიტერიუმებზე და IMF-ის მიერ კრიტიკულად შეფასებულ ეროვნული ბანკის კანონში დაჩქარებული წესით შეტანილ ცვლილებებზე ისაუბრა.

„ეროვნული ბანკის დღევანდელი ხელმძღვანელობის და კონკრეტულად მისი ყოფილი პრეზიდენტის უუნარობაზე, არაკომპეტენტურობასა და არაპროფესიონალიზმზე არაერთხელ გვისაუბრია. არ მესმის, როგორ ჩააბარეს ასეთი საპასუხისმგებლო სფერო პირებს, ვისაც წარმოდგენა არა აქვთ მაკროეკონომიკის ძირითად საბაზისო დებულებებზე, ფულის არსზე და მასზე მოქმედ ფაქტორებზე; ვინც უტიფრად ცდილობდა სიცრუის დამტკიცებას, რომ თითქოს ფულის მასას არა აქვს გავლენა ეროვნული ვალუტის გაცვლით კურსსა და ინფლაციაზე. ეს არის პრობლემის თავი, ეს არის იმათი პასუხისმგებლობა, ვინც ასეთ არაკომპეტენტურ და უპასუხისმგებლო პირებს ჩააბარა ფულად საკრედიტო სფერო.

სებ-ის მომავალი პრეზიდენტი ორ მთავარ კრიტერიუმს უნდა აკმაყოფილებდეს: 1. უნდა იყოს ამ სფერო პროფესიონალი და 2. უნდა ჰქონდეს ლიდერის თვისებები. არიან საქართველოში ასეთი თვისებების მქონე პირები, ვინც აკმაყოფილებს ამ კრიტერიუმებს. იმედია, სწორედ ასეთ პირს შეარჩევენ ეროვნული ბანკის მომავალ ხელმძღვანელად“, — ამბობს თემურ ბასილია.

ეროვნული ბანკის კანონში დაჩქარებული წესით შეტანილ ცვლილებებზე ფინანსისტი ამბობს, რომ ამჟამად მოქმედ კანონში საკადრო საკითხების გადაწყვეტის საკმაოდ გამართული მექანიზმია ჩამოყალიბებული და დამატებითი ცვლილებები საჭირო არ არის.

„სიმართლე გითხრათ, არა თუ ამ ცვლილების დაჩქარებულად მიღების, არამედ, საერთოდ, ამ ცვლილების აუცილებლობასაც ვერ ვხედავ. საქართველოს ეროვნული ბანკის ამჟამად მოქმედ კანონში საკადრო საკითხების გადაწყვეტის საკმაოდ კარგი და გამართული მექანიზმია ჩამოყალიბებული“, — აღნიშნავს თემურ ბასილია.