ბიზნესმენი თემურ ჭყონია ,,ბორჯომის“ ქარხნების დახურვის კატეგორიული წინააღმდეგია. ერთადერთ გამოსავალს იგი კომპანიის დროებით ნაციონალიზაციაში ხედავს და მთავრობას მოუწოდებს, გაუფრთხილდეს ეროვნულ ბრენდს, დანიშნოს დროებითი მმართველი და არ დაუშვას ,,ბორჯომის“ გაჩერება.

,,ბორჯომი“არის საქართველოს ეროვნული ბრენდი და სხვა ქვეყნის აგრესიის გამო სანქცირებული კომპანიის დახურვა არ უნდა დავუშვათ. სახელმწიფომ უნდა მოახდინოს მისი დროებით ნაციონალიზაცია, სანამ დალაგდება სიტუაცია. სხვა გზა არ გვაქვს, სახელმწიფოს მართვაში უნდა გადავიდეს გარკვეული ვადით, დაინიშნოს დროებითი მმართველი და არავითარ შემთხევაში არ გაჩერდეს ,,ბორჯომი“ სხვისი შეცდომების გამო. სახელმწიფომ უნდა მართოს ეს წარმოება, ეს როგორმე უნდა მოახდინოს. დღევანდელი სიტუაცია არ გვაძლევს ქარხნის გაჩერების უფლებას. როდესაც დალაგდება სიტუაცია, მსოფლიო მიიღებს ახალ სტრუქტურას, ეს საკითხიც განიხილება, მაგრამ მანამდე ,,ბორჯომის“ დახურვა უდიდესი შეცდომა იქნება“, - აცხადებს ჭყონია ,,კომერსანტთან“.

ბიზნესმენი ასევე აღნიშნავს, რომ სანამ დემოკრატიული მთავრობა არ მოვა რუსეთში, დაუშვებელია აგრესორი ქვეყნის ოლიგარქებს რომელიმე სტრატეგიულ ობიექტთან დაკავშირებით გავურიგდეთ, ეს ყოვლად მიუღებელია.

 ,,პრობლემა არ არის იმაში, რომ ქართულ ბიზნესს შეიძლება მართავდეს უცხოელი, მაგრამ ის არავითარ შემთხვევაში არ უნდა ყოფილიყო რუსი. სულ მცირე, სათადარიგო გეგმაც უნდა გვქონოდა, დიდი შეცდომა დავუშვით. ამიტომ ვამბობ ასე კატეგორიულად, რომ  არავითარ შემთხვევაში არ შეიძლება რუსებისთვის რაიმე ობიექტის გადაცემა, სანამ დემოკრატიული მთავრობა არ მოვა ქვეყნის სათავეში.

,,ბორჯომის“ დახურვა წარმოუდგენელი სისასტიკეა. ეროვნულ საგანძურზე ვსაუბრობთ, მაგრამ უნდა ვითვალისწინებდეთ  იმასაც, რომ ასობით ადამიანია კომპანიაში დასაქმებული. მეორე მხარეს არის მომხმარებელი, სამკურნალო თვისებების მქონე წყალია და ერთი ადამიანისთვის დაწესებული სანქციების გამო ჩვენ არ უნდა დავზარალდეთ. ეს ჩემი, როგორც მოქალაქის და ბიზნესმენის პოზიციაა, მთავარი სათქმელი სახელმწიფოს ეკუთვნის, ველოდებით რეაგირებას, რაც მხოლოდ ,,ბორჯომის“ დროებითი ნაციონალიზაციით იქნება გამყარებული, ჯერჯერობით სხვა ალტერნატივა არ გვაქვს“, - აცხადებს თემურ ჭყონია ,,კომერსანტთან“.

შეგახსენებთ, რომ სანქციების გამო, „ბორჯომი წარმოებას დროებით აჩერებს.

კომპანიის მიერ გავრცელებული განცხადების თანახმად, „უკრაინაში საომარი მოქმედებების დაწყების დღიდან, კომპანია IDS ბორჯომი საქართველო მძიმე ვითარებაში აღმოჩნდა და იძულებულია, ა/წ 29 აპრილიდან დროებით შეაჩეროს ბორჯომის ჩამომსხმელ ორივე ქარხანაში წარმოების პროცესი.

ცნობისთვის, 2013 წლიდან „IDS ბორჯომის საკონტროლო 60%-იან პაკეტს რუსელი „ალფა ჯგუფი ფლობს. „ალფა ჯგუფის დამფუძნებელი მიხაილ ფრიდმანი სანქცირებულ ოლიგარქთა სიაშია.

მარი ჩიტაია