ბიზნესმენი თემურ ჭყონია ,,ბორჯომის“ ქარხნების დახურვის ფაქტს ეხმაურება და საუბრობს იმ შესაძლებლობაზე, რაც ამით  ეძლევა კომპანიას ,,წყალი მთის“, რომლის ახალი ტექნოლოგიური ხაზი წარმოებაში ზუსტად თვენახევარში ჩაეშვება.

როგორც ,,კომერსანტთან“ ჭყონია ამბობს, ჯერ ადრეა საუბარი, ვინ დაიკავებს ,,ბორჯომის“ ადგილს მტკნარი წყლის სეგმენტში, თუმცა ამ მხრივ კომპანიის ,,წყალი მთის“ შანსი ყველაზე მეტია, რასაც ხარისხი და მომხმარებლების მაღალი ნდობა განაპირობებს.

,,ბორჯომის დახურვა ბაზრის წილს გამოათავისუფლებს, ეს ლოგიკურია. სენსაციაზე არ ვსაუბრობ, თუმცა თუ გვეკითხებით, ვინ დაიკავებს მის ადგილს, ჩვენ უფრო მეტი პერსპექტივა გვაქვს.  ხარისხი, მაღალი ნდობა, ინოვაციური ხაზი - ყველა შესაძლებლობაა, რომ პოზიციები გავიძლიეროთ. მით უმეტეს, მუდმივად მატულობს წარმოებაც და ამ ეტაპზე ჩვენი გაყიდვების მაჩვენებელი შეადგენს 10 მილიონ ბოთლს სეზონზე.  როცა წარმოების გაფართოებაზე და ,,ბორჯომის“ ჩანაცვლებაზეა საუბარი, ცხადია, არსებული რესურსი არასაკმარისია, გვაქვს სერიოზული პროგრამა, დაახლოებით 19 მილიონი ლარის ინვესტიციას ვახორციელებთ, ახალ ტექნოლოგიურ ხაზს ვყიდულობთ. ვთანამშრომლობთ კომპანია ,,სიდელთან“, რომელიც აწარმოებს მაღალტექნოლოგიურ ხაზებს უალკოჰოლო სასმელების სეგმენტში. პროექტს თვენახევარში დავასრულებთ. ასეთი მაღალმწარმოებლური, ულტრათანამედროვე ხაზი ბაზარზე, კავკასიის მასშტაბით,  არც ერთ კომპანიას არ აქვს. ახალი ტექნოლოგია შესაძლებლობას მოგვცემს, 50 000 ბოთლი ვაწარმოოთ საათში. წარმოება  3-ჯერ გაიზრდება. პროექტი დაახლოებით ივნისის შუა რიცხვებიდან ჩაეშვება“, - აცხადებს ,,კომერსანტთან“ თემურ ჭყონია.

 როგორც ბიზნესმენი აცხადებს, სხვა კომპანიებიც ეცდებიან, ყველა შეეცდება შანსის გამოყენებას, მაგრამ რეალურად ,,ბორჯომს“ ჩაანაცვლებს კომპანია, რომელიც გამოირჩევა ინოვაციური დისტრიბუციით და მაღალი ხარისხით.

ამ მხრივ ,,წყალი მთის“, ჭყონიას შეფასებით, უალტერნატივოა.

შეგახსენებთ, რომ დღეიდან ბორჯომის ჩამომსხმელ ორივე ქარხანაში წარმოების პროცესი ჩერდება, ამის შესახებ „კომერსანტს“ კომპანია IDS ბორჯომი საქართველოში განუცხადეს.

კომპანიაში განმარტავენ, რომ  უკრაინაში საომარი მოქმედებების დაწყების დღიდან კომპანია IDS ბორჯომი საქართველო მძიმე ვითარებაში აღმოჩნდა. პროდუქციის რეალიზაციის ძირითად ბაზრებზე შექმნილ რთულ ვითარებას დაემატა საბანკო ანგარიშებზე შეზღუდული წვდომა, რამაც კომპანიას ჩაუკეტა სავალუტო შემოსავლების მიღებისა და კრედიტორებთან ანგარიშსწორების შესაძლებლობა.

მარი ჩიტაია