ტენდერებში პრობლემები ძირეულია და კოსმეტიკური ცვლილებებით ვერ მოგვარდება - ამის შესახებ რადიო ,,პალიტრასა" და ,,პალიტრანიუსის" გადაცემაში ,,საქმე" ფინანსისტმა, გიგა ბედინეიშილმა განაცხადა.

მისი თქმით, პრობლემის სათავე კორუფციული სქემებია, რაც საბოლოოდ უხარისხო პროდუქტსა და ტრაგედიებს იწვევს.

„მერიის და მთავრობის მხრიდან, აშკარაა მცდელობა ვაკის პარკის ტრაგედიაზე პასუხისმგებლობა მეისრეებზე გადაიტანონ. ყველაფერს აკეთებენ, რომ კალაძემ და პარტიამ პოლიტიკური ზიანი არ მიიღოს და შემოფარგლული იყოს ტრაგედიის მიზეზები. არ უყურებენ ფუნდამენტურად პრობლემას, რომელსაც ღრმა ფესვები აქვს. მერიაში რომ ძალიან კორუფციული სქემებია, ეს არ არის ახალი და ამ კორუფციის თანმდევი შედეგია დღეს რაც ხდება. ისეთი სისტემაა, რომელიც ემსახურება მხოლოდ ერთ მიზანს, ბიუჯეტის სახსრებით ჯილდოვდებიან მხოლოდ ის ბიზნესები, რომლებიც სახელისუფლებო ვერტიკალთან ახლოს არიან და მმართველ პარტიას გამარჯვებაში ეხმარებიან. სინამდვილეში ეს არის მთავარი პრობლემა. ამიტომაა, რომ ხაზინის გავლით მეტის ხარჯვა ხდება, ვიდრე უნდა ხდებოდეს. მარტივია, რაც მეტ ფულს აკონტროლებს მერია, მეტი შანსია, მით უფრო მეტი ალბათობაა კორუფციული არხებით ფულის შექმნის. გარდა ამისა, გამოყენებული იყოს ხაზინის ფონდები მთავრობის ინტერესების მიხედვით. სინამდვილეში ესაა, ფუნდამენტური პრობლემა.

სინამდვილეში, დღეს ტენდერები ხორციელდება ძვირად და უხარისხოდ. სახელმწიფოს მიდრეკილება ნამდვილად აქვს ამისკენ, ამიტომ ჩვენი ეკონომიკური და ფისკალური პოლიტიკა უნდა იყოს ისეთი, რომ რაც შეიძლება ნაკლებმა ფულმა გაიაროს მთავრობის ხელში. მთავრობა, ყოველთვის უფრო ცუდად ხარჯავს ფულს. კოსმეტიკური რეფორმები არაფერს უშველის, ძირეული ცვლილებებია აუცილებელი“, - განაცხადა ბედინეიშვილმა ,,საქმეში“.

ცნობისთვის, 13 ოქტომბერს ვაკის პარკში, შადრევანში სამი ბავშვი ბურთის ამოსატანად ჩავიდა, რა დროსაც მათ დენმა დაარტყა. ბავშვები კლინიკაში სასწრაფო დახმარების ბრიგადამ გადაიყვანა. ერთ-ერთი ბავშვის, 13 წლის გოგონას მდგომარეობა თავიდანვე მძიმე იყო და ის ხეჩინაშვილის კლინიკაში გარდაიცვალა. 2 მათგანი გადარჩა.

წყარო: https://www.bpn.ge/