სინდისს მოუხმონ იმ ჩასაფრებულმა და ანგაჟირებულმა ადამიანებმა, რომლებიც ამბობენ, რომ საქართველოში ჯანდაცვის სამინისტრომ ვერ მოაგვარა ოჯახის ექიმების ინსტიტუტი, რომ ბინაზე დარჩენილთა მკურნალობა გვიანდება და სასწრაფოები იგვიანებენ, - ამის შესახებ ინფექციური საავადმყოფოს გენერალურმა დირექტორმა, თენგიზ ცერცვაძემ ჟურნალისტებს განუცხადა.
როგორც მან აღნიშნა, რეგულაციების მოხსნის და შემსუბუქების შემდეგ, შესაძლოა, კორონავირუსით ინფიცირებულთა რაოდენობა გაიზარდოს ან აღარ შემცირდეს, რადგან საქართველოს მოსახლეობა სრულად ვაქცინირებული არ არის.
„რეგულაციების მოხსნის შემდეგ, შესაძლოა, იყოს ინფიცირების გარკვეული მატება, ან კლების ტენდენცია შეჩერდეს, მაგრამ ამის გაკეთება აუცილებელი იყო, ვინაიდან ასეთია მსოფლიო ტენდენცია. ეკონომიკა უნდა გაიხსნას, ქვეყანა უნდა დაუბრუნდეს ნორმალურ კალაპოტს, უნდა აღდგეს სპორტული სანახაობები, კულტურული ღონისძიებები, შეხვედრები, ქორწილები, ქელეხები და ა.შ. მინდა მოსახლეობა გავაფრთხილო, ჩვენ მეტი რისკის ქვეშ ვართ რეგულაციების მოხსნის შემთხვევაში, ვიდრე ევროპისა და აშშ-ის ქვეყნების უმრავლესობა და რატომ- ისინი სრულად ვაქცინირებული არიან, ხოლო საქართველო სრულად ვაქცინირებული არ არის. 1/3-ია მხოლოდ ორჯერ ვაქცინირებული და დაახლოებით 10%-ს აქვს „ბუსტერი“ გაკეთებული. ეს სერიოზულ პრობლემებს შეგვიქმნის“,-განაცხადა ცერცვაძემ.
მისი შეფასებით, მოსახლეობას ვაქცინაციისთვის ყველა პირობა ჰქონდა შექმნილი.
„გავითვალისწინოთ, რომ ჩვენ სრულად ვაქცინირებული ქვეყანა არ ვართ და ეს ხალხის ნებით მოხდა. ხელმძღვანელობამ მოსახლეობას ყველა პირობა შეუქმნა, რომ ისინი სრულად ვაქცინირებული ყოფილიყვნენ. ბევრად უკეთესი პირობა, ვიდრე ევროპისა და ამერიკის ქვეყნებში“,-განაცხადა ცერცვაძემ.
მან მოსახლეობას მიმართა, ატარონ პირბადე და ზაფხულამდე აიცრან.
„ახლა ერთ რამეში მაინც გამოვიჩინოთ პასუხისმგებლობა, ვატაროთ პირბადეები და ნუ შევწყვეტთ ვაქცინაციას, ჯერ კიდევ არ არის გვიან. ზაფხულამდე აცრების მაქსიმალურ რაოდენობას უნდა მივაღწიოთ, რადგან როდესაც მობილობა გაიზრდება და საკურორტო სეზონი გაიხსნება, მოსახლეობის რაც შეიძლება მეტი ნაწილი ვაქცინირებული იყოს“,-განაცხადა ცერცვაძემ.
მისი თქმით, საქართველოში მაღალი იყო კორონავირუსით ინფიცირების რიცხვი, რის გამოც ოჯახის ექიმებთან დაკავშირება ზოგიერთ შემთხვევაში პრობლემური გახდა.
„ყველას დაავადების პირველ საათში ექიმი ვერ დაუკავშირდება. შეუძლებელია, როგორ უნდა დაუკავშირდეს ერთი ექიმი 100 ავადმყოფს, მაგრამ ვისაც უფრო სჭირდება, არც ერთი მათგანი არ დარჩენილა ექიმის დახმარების გარეშე. ჩვენთან ექიმის დახმარების არქონის გამო არავინ დაზარალებულა და არავინ გარდაცვლილა“,-განაცხადა ცერცვაძემ.
ipn.ge