„ტექინსპექტირების რეფორმას მიმართვიანობის ნაკლებობა უქმნის საფრთხეს, 2019 წელთან შედარებით მიმართვიანობამ საგრძნობლად იკლო, ეს არის პარადოქსული სიტუაცია, მაშინ როდესაც ავტომობილების რაოდენობა მინიმუმ 200 000 მაინც არის გაზრდილი, “ - ამის შესახებ რადიო „კომერსანტის“ ეთერში „საქართველოს ტრანსპორტისა და გზების ასოციაციის“ ხელმძღვანელმა დავით მესხიშვილმა განაცხადა. მისი თქმით მიმართვიანობასთან დაკავშირებით რამდენიმე პრობლემაა. ერთ-ერთი მათგანი არის ის, რომ ევრო დირექტივები ბოლომდე დანერგილი არ არის, ხოლო მეორე კანონის აღსრულებას უკავშირდება.
„ევრო დირექტივები, რაც ე.წ გზისპირა ინსპექტირებას უკავშირდება, პრაქტიკულად ბოლომდე დანერგილი არ არის, ეს არის სატვირთი და კომერციული ტრანსპორტისთვის. ე.წ. ჭკვიანი კამერები წინა პერიოდში ხშირად იყო გაუმართავი, რაც პრობლემას ქმნიდა. როდესაც გვაქვს საინფორმაციო ბაზა, იცი ავტოპარკი, შეიძლება შეტყობინების სისტემა აამუშაო და ამ შემთხვევაში საერთოდ აღარ იქნება კანონის აღსრულება კამერებზე მიბმული და პროგრამულად დაიგზავნება შეხსენების შეტყობინება, შემდეგ ადმინისტრაციული სანქციაც. ამას საერთოდ არ სჭირდება ჭკვიანი კამერები, თანამედროვე ტექნოლოგიების დანერგვა და განვითარებაა საჭირო.
რეფორმის დასაწყისში განმეორებით ინსპექტირება უფასო იყო, თუმცა ეს უფასო ტექინსპექტირების ცენტრების კისერზე გადადიოდა. ტექინსპექტირების მიზანი ტექნიკურად გამართული ავტომობილი უნდა იყოს, რომ ტექინსპექტირება პირველივე ჯერზე წარმატებით გაიაროს“, - აღნიშნა დავით მესხიშვილმა.
მესხიშვილმა კიდევ ერთ გამოწვევაზე, გეოგრაფიულ ხელმისაწვდომობაზე ისაუბრა და განმარტა, რომ დღეის მდგომარეობით, დაახლოებით 15 -ზე მეტი მუნიციპალიტეტი, ტექინსპექტირების მომსახურებას ვერ იღებს. ზოგიერთი რეგიონის მაცხოვრებლებისთვის კი ტექინსპექტირება ძალიან ძვირი ჯდება, რაც არასამართლიანია.
დავით მესხიშვილის თქმით, გამოწვევაა ავტობუსებისა და მიკროავტობუსების ტექინსპექტირებაც: `„როდესაც ჩვენ ავტობუსების და მიკროავტობუსების პრობლემა შევისწავლეთ გასაოცარი ციფრები მივიღეთ, შემოწმებაზე არ მიდის არავინ, ის ავტოსადგურები, საიდანაც მიკროავტობუსები და ავტობუსები დადიან, თვალს ხუჭავენ იმაზე, რომ ტრანსპორტს ტექინსპექტირება გავლილი არ აქვს. არავინ იცის ვინ არიან, საიდან მოვიდნენ და შესაბამისი კატეგორიის მართვის მოწმობაც არ აქვთ და გვაქვს ჩვენ ექსკურსიის სახელით ცნობილი ტრაგედიები.
სრული განუკითხაობაა იქ, საიდანაც მგზავრების გაყვანა ხდება. მე ვიცი, რომ სახმელეთო ტრანსპორტის სააგენტოს აქვს რეფორმის პროექტი, თუმცა დიდი ხანია გაჩერებულია, ამიტომ იმედს ვიტოვებ და მინდა მივმართო შესაბამის სტრუქტურებს, იმიტომ რომ ამ განუკითხაობას ადამიანების სიცოცხლე ეწირება. ყოველთვიურად ჯარიმის გადახდა ურჩევნიათ საკუთარი ავტომობილის მოწესრიგებას. უმეტესობა ამ სატრანსპორტო საშუალების არის სატვირთო და მათ არ უნდა გადაჰყავდეთ ადამიანები, ეს სატრანსპორტო საშუალებები კუსტარულად არის გადაკეთებული სამგზავრო სატრანსპორტო საშუალებად, ჩაჭედებულია ე.წ. ტაბურეტები, ჩაკეტილია ე.წ. ავარიული გასასვლელები და შედეგად ვიღებთ ფატალურ შემთხვევებს“, - აღნიშნა დავით მესხიშვილმა.