ონლაინ მუშაობის რეჟიმზე გადასული ტექნიკის მაღაზიების დიდი ნაწილი კომპანიის 100%-იან ზარალს გადაურჩნენ, ნაწილი კი ვისაც ონლაინ პლატფორმა არ აქვს, სრული ზარალის წინაშე აღმოჩნდნენ.ტექნიკის მაღაზიებზე  ორ დღიანი პაუზა, სანამ საქმიანობის ნებართვას ისევ მიიღებდნენ, ფინანსურად უარყოფითად არ ასახულა. საქმიანობის გაგრძელებას კი სრული წესების დაცვით აპირებენ. 

ტექნიკის მაღაზიებში საუბრობენ, რომ ონლაინ გაყიდვების მაჩვენებელი სხვა პერიოდთან შედარებით გააქტიურებულია თუმცა, პროცენტულად მაღაზიის ყოველდღიური გაყიდვების მაჩვენებელს ვერ უტოლდება.

გააქტიურებულ ონალინ გაყიდვებზე საუბრობს „ტექნო ბუმის“ დამფუძნებელი ანზორ ქოქოლაძე. მისი თქმით კომპანია, ონლაინ ვაჭრობის მეშვეობით მომხმარებელებს უსაფრთხო მომსახურებას სთავაზობს. 

„სანამ მთავრობა დადგენილებას მიიღებდა, რომ ისევ შევძლებდით ონლაინ ვაჭრობას, პაუზა ავიღეთ, თუმცა, ახლა ისევ გავაგრძელებთ საქმიანობას და ისევ დავიცავთ უსაფრთხოების ყველა ნორმას.  ონლაინ ადრეც ვიღებდით შეკვეთებს, თუმცა, ახლა მეტად გააქტიურებულია. გზადაგზა უფრო ვხვეწავთ მუშაობის პრინციპს, რომ მომხმარებელს დისკომფორტი არ შევუქმნათ.მაღაზიასა და ონლაინ ვაჭრობას ერთმანეთს ვერც შევადარებთ, მაღაზიაში უფრო მაღალი მაჩვენებელი იყო  ყოველთვის, თუმცა ახლა ხალხი ონლაინ შესყიდვებზე   გადაეწყო  და როგორც თბილისში ასევე სხვადასხვა რეგიონებიდან ხდება შეკვეთა და ნივთის მიწოდება.

გაყიდვების ზოგადი მაჩვენებელი რა თქმა უნდა დაკლებულია,თუმცა 100%-იან  წაგებაზე არ მიდის მაღაზია, ზუსტად იმ ონლაინ პლატფორმის გამო, რომელიც გვაქვს.“-ამბობს ანზორ ქოქოლაძე.

„ზუმერის“ მარკეტინგის მენეჯერის ეთო მერებაშვილის თქმით, ბოლო პერიოდში საკმაოდ გაზრდილია ონლაინ შეკვეთების მაჩვენებელი, თუმცა, კომპანიის ფინანსური მოგება მაღაზიების მუშაობის დროს ბევრად მაღალი იყო.

„რამდენიმე დღე შეჩერებული გვქონდა მუშაობა, პრემიერის საბოლოო გადაწყვეტილებას ველოდებოდით.  მაღაზია რა თქმა უნდა დაკეტილი გვაქვს, ახლა კი   ონლაინ რეჟიმში გავაგრძელებთ მუშაობას, ყველანაირი წესის დაცვით. კიდევ ერთხელ გამოვითხოვეთ ჯანდაცვის სამინისტროდან რეკომენდაცია, რომლის მიხედვითაც ვხელმძღვანელობდით, მაგრამ კიდევ ერთხელ გადავხედავთ დეტალებს, რომ ჩვენი მომხმარებლის და თანამშრომლების უსაფრთხოება მაქსიმალურად დაცული იყოს. ბოლო დღეებში ონლაინ მაღაზიას ძალიან კარგი მუშაობა ჰქონდა, მითუმეტეს თუ შევადარებთ ერთი თვის წინანდელ პერიოდს. მაშინ, როდესაც ქსელები ღია და ხელმისაწვდომი იყო. ონლაინ რეჟიმში ასეთი დატვირთვით არ ვმუშაობდით, დღეს კი პირიქით,“-ამბობს  ეთო მერებაშვილი.

განსხვავებული მდგომარეობაა ტექნიკის მაღაზიათა ქსელ  „არაი თუმოროუში“. როგორც  კომპანიის წარმომადგენელი აცხადებს, მათ კომპანიას ონლაინ მაღაზია არ აქვს, რის გამოც მთლიანი ქსელი გაჩერებულია და  სრულ ფინანსურ ზარალს განიცდის.

„არ გვაქვს ონლაინ მაღაზია და როგორც მაღაზიების, ისე ამ  მიმართულებითაც გაჩერებული გვაქვს მუშაობა,  შეიძლება ითქვას კომპანია 100%-იან ზარალზეა წასული.ჯერ არ შეგვიმუშავებია გეგმა დავიწყებთ თუ არა ონლაინ გაყიდვებს. იქედან გამომდინარე, რომ  ამ მიმართულებას გარკვეული პერიოდი უნდა, საიტის დამუშავებას და სხვა დეტალებს.ამ ეტაპზე სამოქმედო გეგმაც არ გვაქვს და ველოდებით ქვეყანაში ვითარების დასტაბილურებას.“-ამბობს „არაი თუმოროუს“ წარმომადგენელი.

შეგახსენებთ, რომ ქვეყანაში ონლაინ ვაჭრობა ნებადართულია, შესაბამისი წესების დაცვით, რომელსაც ჯანდაცვის სამინისტრო აქვეყნებს. 

ნათია ლომიძე